Mdarbıd d’Suleymani u gabo d’Hizballa mbayanle u methloneyde bu Iraq

U gabo d’Hizballa d’Lebnon, bıthır mu qatlo d’Qasem Sulaymani mıdle cal ruhe i mdabronutho da grube mzayne da Şica awkith d’Algaşd Alşacbi bu Iraq.

 Lfuth mabuce Iraqoye, u gabo d’Hizballa mbayanle u mathlonayde bu Iraq şex Muhammad Alkawtharani laşan dmole i xalyutho dıtıryole Sulaymani.

 Bıthır me zabno karyo mu qatlo du rişono d’Faylaq Alquds Qasem Sulaymani, u gabo d’Hizballa d’Lebnon dıkmısnıd mu İran, sımle knuşye msarhıbe cama rişone da grube mzayne du Iraq, bnişo dmihaydi mqabıl di xalyutho rabtho dıtrele Sulaymani.

Tre mabuce dhawilın xabro ma knuşyani, bi mawdconutho dhulın l’Royterz, mathkarlın da knuşyani kıtwolın u nişo dmisım sdirutho folitiqoyto bayn da grube Iraqoye mzayne dkito fliğutho baynothaye.

Camgabıdathe, tre mabuce hrene dkıtne qariwe mu İran mawdaclın du gabo d’Hizballa dımbayanwola Amerika xıd tukoso marıhbono, şafıc li harake laşan dımcadır bu mloyo di xalyutho dıtrele Sulaymani bayn da grube Iraqoye d’Alhaşd Alşacbi. Ba knuşye dsımle u gabıo d’Hizballa driş aydarbo kibe u İran wa grube mzayne dıksındile dmaqwın i moruthaththe bu qlimo du madınho mescoyo.

Lfuth cayni mabuce Iraqoye, ba knuşyani dhawın bayn Hizballa wa rişone da grube mzayne da Şica du Iraq bu yarho d’Konun u Haroyo dşaficina, mbayın şeh Muhammad Alkawtharani dkıtyo u mathlono d’Hizballa bu Iraq laşan dmoyıd i wolitho di mdabronutho da grubani hul dımbayın u İran farsufo hreno mdarbıd Qasem Sulaymani.

Alkawtharani dmawlıd bi mditho d’Alnajaf bu Iraq, kıtle esore cama grube mzayne d’Alhaşd Alşacbi, ukımcadarwo Sulaymani bu tuyobo da knuşyayde bu Iraq ubu şroyo da qetre dkowanwo bayn da grube mzayne da Maşılmone Şica.