Meral Akşener nafiqo mu ittifaq camoyo d’Turkiya

TURKİYA – Bıthır mıd mbayın u siqumo da ğuboye d’Turkiya a gabe wa zawce folitiqoye mşarelın dsaymi a hşowathe dmaydi qole zıttır. Bhawxa aykanoyutho şğışto siyasi 6 gabe dkıtwın bi saqıbloyutho mıtafaqwolın dcıbri la ğuboye camhdode laşan dmadrın i şıltonutho dha farsufo dkıtyo u rişqutno Erdoğan. A gabani dkıtne u Gabo qutnuthoyo du Camo CHP, u gabo d’İyi, u Gabo d’Saadet, u Gabo Deva, u Gabo Dactith,  wu Gabo Demoqratoyo mıtafaqwolın dhowın u ğbino dıkmitawmarle ğbino camoyo.  

U ğbinano dsımle knuşye mşahılfe u dmawdacwole dıgmıştawtfi la ğuboye bha qolo, athmıl bu knuşyo dhawi, u gabo d’İyi dkıtyo bi rişonutho d’Meral Akşener dıfrişo mu gabo tuhmonoyo di MHP; mawdacla dnafiqi mu ğbino camoyo. U hawxa ucdo fayişi 5 gabe dıkmahwe dımdawmi camhdode xıd ğbino dıgmıştawtıf la ğuboye dıgdowın 14 İyor di şatathe. Bıthır mıd u Gabo d’İyi mawdacle dnafıq mu ğbino camoyo mşarelın a droşe u nuholo mın hawi u aydarbo gıdhowın a ğuboye du athro.  

U mede dıkmahwe u Gabo d’CHP kımraşıh u rişono Kem a l Kılıçdaroğlu dkıtyo bu şırşayde Alawi. Wu gabo d’İyi lıkqodır maqbıl u medano. Dakbar cal dkıtyo Alawi. Metul du şerşo du Gabo d’İyi kothe mu Gabo tuhmonoyo di MHP d’Devlet Bahçeli. Ba maqırhonwotho dhulın a gabe dfayişi bu ğbino camoyo mawdalın du tarcathe ftihoyo lkul gabo, lkul gawno dkito bu athro, u hathe kmifaşqo dkıtyo qroso d’cayno lu Gabo d’HDP ula gabe hrene dkıtne larwal mu ittifaqanno.   

Bıthır mucdo u Gabo d’İyi layko gıdsonıd ruhe latyo idico, mede ha idicoyo di hawa da ğuboye d’Turkiya gışuhno. Mu gabo di şıltonutho mawdaclın du tarcathe ftihoyo l’gabe hathe elo, bi sbuthathe kito maktabzabno dlatyo rahuqo  du gabo d’İyi frişi mu gabo di MHP dkıtyo bi şıltonutho cam Erdoğan.  Dakbar bi siyase kito klayotho u yamino semolo elo b’Turkiya ba ışne haroye hın ma gabe kibin mbadli xtuto u klayto belhude dfayşi bi rişonutho, mathlo lu medano, bu zabno du gabo di MHP dkıtwe bi saqıbloyutho lo fayış xabro dlo mırle Bahçeli cal Erdoğan, elo ucdo hawi u mdafcono d’Erdoğan bkul mede.