Metin Rhawi (GHS) cala şuşote folitiqoye haroye d’Suriya: Noşo lıklozım ucdo dqonıc la mamle d’Darımsuq elo dnotır lu camlayda wu aydarbo gıdmtabqo a şudoyayda

STOCKHOLM – Athmıl sımwole ABF-Arbetarnas Bildningsförbund, Olof Palme Center wu gabo da Sosyaldemoqratoye du Swed, panel b’Stockholm leşan dmıdroşo i aykanoyutho d’Suriya, bıthır mu nfolo du rejim catiqo d’Başar al Asad. Beyn da hadire, kıtwo mşale u mathlone d’gabe frişe; xıdu koalisyon Athronoyo d’Suriya, u gabo da Came Demoqroye b’Suriya, Şiyar Ali xıd mathlono mu Mawtbo d’Suriya Demoqratoyto u Metin Rhawi xıd mathlono du gabo du Huyodo Suryoyo b’Suriya bu Swed ğer mathlone d’zawce u şutose da neşe-cam mınyono celoyo d’hadire.

Bu şuroyo di orucuthathe, bşıkıl rwiho mahke calu nfolo du rejim catiqo bıthır 14 eşne d’qrobo, calu cnufyo dhawi, a şuşote folitiqoye haroye, u qyomo dımde beyn di şultonutho d’Darımsuq u d’QASAD uğer sebwotho ubi harayto kle, calu maşıqlo di demoqratoyutho b’Suriya. Bu tarano, hiw mkono la czime dobın i hzaytathe cali sbutho du prosess du dialog athronoyo. Xıd mathlonyotho da şutose da neşe, mahke cali socurutho dsımwo l’Suriya u kalın calu dawro di athto bu maşıqlano.

Elo a droşe dhawın bi rişonutho du rişono d’Suriya Ahmed al Şarıc calu dialog athronoyo, simi sturyo me Metin Rhawi u Şiyar Ali cal dlo czimi a mathlone da came kulle u loste bu şekolo du nomuso hatho dtrele a came şerşoye du athro larwal da droşani. Rhawi bu mamlayde, kali cali hiyoyutho du camaydan u gawonoyith i ithutho da Mşihoye b’Suriya dlo mawde ebeye u dlo hşiwi ba ytawyothani d’Darımsuq, u mahkele calu qtolcamo dhawi ma hayle d’HTŞ cali qalılto da Callawiye u Mşihoye ba dukotho dkıtne qariwe lu sforyamo d’Suriya.

Bu mamlayde Rhawi dımfanele a şwole dımqadmi, huwle’ste i hzayto d’GHS calu sistem di kinutho, i aykanoyutho folitiqoyto gawoyto, i ulsoyutho du sistem du yulfono udu terkiwo d’şultonutho dlatyo qentrunoyto u m’akadleste, d’noşo lıklozım ucdo dqonıc la mamle d’Darımsuq elo dnotır lu camlayda wu aydarbo gıdmtabqo a şudoyayda bnişo dqodır u macırbo dmaqım a tedbirayde cal Darımsuq. Beyn da talabani, grışşe Rhawi’ste u zuhoro cala zedqe da qalilotho wi ulsoyutho di mathlonuthathe bu nomuso esonoyo hathto d’Suriya.