Bi mditho Suryoyto d’Barıtle bi daşto d’Ninwe bu garbiyo du Ciraq, sim u zawho du çınnaz udu cufoyo du tlithoytube mnohnafşo Mor Athanasyos Matti Mattuka

BARITLE, DASHTO D’NINWE, Ciraq – Athmıl casriye, i qadişutho du fatıryarxo Mor İğnatiyos Yusıf Tlithoyo Yunan mrayşanle u zawho du çınnaz udu cufoyo du tlithoytube mnohnafşo Mor Athanasyos Matti Mattuka dkıtwe u rişhsayo dmeqım di marcitho d’Boğdod di cito Suryoyto Qatholiqoyto. 

U zawhano dsim bi cito d’Mor Gorgis bi mditho Suryoyto d’Barıtle bi daşto d’Ninwe, mıştawtaflele menyono ma hsayo da marciyotho du Ciraq udu qlimo d’Kurdistan, menyono d’xuroye u kohne mi cito Suryoyto Ortodoksoyto, u menyono hreno dı dayroye, u dayroyotho u şamoşe u şamışyotho, cam mşale mdinoye u folhoye di daşto d’Ninwe u kunoşo ğalabe rabo dı mhaymne. 

Bıthır mdıqre u mgalyun mqadşo, fatıryarxo Yunan bi koruzuthyade mahkele cala haye du mnohnafşo hasyo Matti Mattuka dımşabele i cito Suryoyto bkul dbihuthnafşo u şarirutho mu zabno dmasrahwo hasyo bi şato da na’1979. I qadişuthayde mşalatle ste bahro cala fulhone sagiye dsımwole hasyo Mattuka bu haqlo ruhonoyo, citonoyo, cılmoyo ubu haqlo du bnoyo u hethotho da citotho mu zabno dmasrahwo hasyo li marcitho d’Boğdod bi şato da na’1984 uhul dımqadamwole istıcfayde. Bebzabno, fatıryarxo Yunan grışle u zuhoro calu qtolcamo di cito d’Sayıdıt Alnajat d’Boğdod d’athiwo luhwoyo bi şato harayto di mdabronutho dsımwole hasyo Mattuka li marcitho. 

Bu zawhano, maqım b’şıkıl mahişono slawotho u qole citonoye lfuth u tekso Suryoyo d’Antiyuxiya, ubıthır mathe a’hsayo, a’kohne wa şamoşe tcınlın u fağro du tlithoytube hasyo Matti Mattuka, u mhalaxlın b’zuyoho ruhonoyo dsim hedor du madhıbhe mqadşo ub’gawıd di cito. 

Bu huthomo du zawho, u fağro du mnohanfşo hasyop Matti Mattuka mahıt ba bethıqbure da hsayo uda kohne laltah di cito d’Mor Gorgis bi mditho d’Barıtle dmawladwo eba.