12/03/2020

Mhın a dukotho da hayle du İran b’Suriya

U koalisyon emwothoyo dkımrayşınole Amerika mqabıl du tukoso marıhbono dı Dacış, sımle cuqobe oyaroye cal qentrune da grube mzayne d’Alhaşd Alşacbi dıkmısnodi mu İran.

Ba cuqobani dsimi bi mditho d’Albu Kamal dıknıflo calu thumo bayn d’Suriya wu Iraq, qtil 26 farsufe ma grube d’Alhaşd Alşacbi u zıd m’10 hrene mjarhi.

Adyawma sim cuqobe oyaroye cal qentrune d’Alhaşdi Alşacbi udı grube hrene mzayne dıkmısnodi mu İran. A’cuqobani athın luhwoyo bıthır mu hçomo dsim athmıl blalyo b’soruhe di Katyuşşa cali nuqazto folhoyto d’Altaji bu garbiyo d’Boğdod dıksaymi baytoyutho la folhe du koalisyon emwothoyo mqabıl Dacış.

Lfuth i mawdconutho dıfrısla i mşatasto d’Suriya da zedqe noşoye, a’cuqobani simi cala qentrune d’Alhaşd Alşacbi dkıtne bi nuqazto d’İmam Cali ubi fnitho d’Alhusyan hedor di mditho d’Albukamal dıknıflo bu madınho d’Suriya qariwo mu thumo du Iraq.

Ba cuqobani u koalisyon enmwothoyo qtile 26 farsufe ma grube d’Alhaşd Alşacbi, ube bzabno şmic u qolo d’10 furqoce bu noquso dhawın bi fnithathe.

Ba tebe dıfrisi ba şutose du tboco froso du macırbo, mawdıc du hçomano dsim cal Albukamal athi xıd funoyo lu hçomo dsim cali nuqazto d’Altaji bu Iraq.

İ mditho d’Albukamal bu madınho d’Suriya kmıhşowo nuqazto stratijikoyto du thumo camu Iraq. Ubu darbo di mdithathe a’grube d’Alhaşd Alşacbi dıkmısnodi mu İran, knıqli b’şıkıl mtakso zayne u mcadrınwotho lojestik mu Iraq l’Suriya, bnişo dsındi a’haylawotho du rejim.

Be bzabno, Albukamal kmışhowo mditho rişoyto lu İran dkıbco dmaqwiyo u haylayda calu darbo dkımşare m’Tahran huli erişkoyto d’Lebnon Bayrut.

Bu şuroyo di şatathe, İsroyelste kımo naqlat sımwola hçome cala nuqazyotho İranoye dkıtne bi fnitho d’Albukamal b’Suriya.