Mor Gewargis III mawdacle dkobıc dmıstacfe mi wolithayde

İ qadişutho du fatıryarxo di cito d’Madınho d’Othuroye, Mor Gewargis Tlithoyo Sliwa mawdacle dkobıc dmsıtacfe mi wolithayde xıd rişono u mdabrono di cito bu siqumo d’22 bu yarho d’Nison dıbqamuthayna.

 Bu siqumano i Sunados mqadaşto gıdlaymo bu Iraq, laşan dminaqe fatıryarxo hatho li cito d’Madınho d’Othuroye.

 İ notarrozutho di Sunados mqadaşto di cito d’Madınho d’Othuroye, bi maqırhonutho dıfrısla lu tboco froso, mawdacla di qadişutho du fatıryarxo Mor Gewargis Tlithoyo Sliwa sımle qroyto lı knuşyo dilonoyo di Sunados dgımitayıb bu qentrun fatıryarxoyo bi mditho d’Ankawa, bu siqumo dıknofıl bayn 22 uhul 29 bu yarho d’Nison dıbqamuthayna.

Bi maqırhonutho dıfriso, kmitathkır du fatıryarxo Mor Gewargis mşadarwole egartho la hsayo di cito bu siqumo dı tlotho bu yarhano. Bi egarthathe i qadişuthayde kmawdıc dkımdawım heş bu maşıqlo du hulmono mu kewo dqayıthwoleyo bu zabno dkıtwe b’socurutho lu athro d’Almanya bu yarho d’Konun u Qadmoyo i şato da 2019.

Mor Gewargis Sliwa bi egarthayde mawdacwole di aykanoyutho du hulmonayde hawyo yuqro rabo acle farsufoyith, u mawxa i qadişuthayde mıftakarle ğalabe bi sbutho dkıtle mkono dımdawım bi mdabronutho du kursiyo fatıryarxoyo ubi mşaluthayde xıd rişono di cito.

Calalthe, i qadişuthayde hule xabro bi egarthayde la hadome di Sunados, ub’sebyono kamilo mawdaclelın dkobıc dmıstacfe mi wolithayde xıd fatıryarxo di cito d’Madınho d’Othuroye bu siqumo d’22 bu yarho d’Nison dıbqamuthayna, mawxa ste i qadişuthayde sımle qroyto la hadome di Sunados dlaymi bu qentrun fatıryarxoyo bu siqumano.

Bu huthomo di maqırhonutho fatıryarxoyto, i notarrozutho di Sunados mqadaşto mqadamla tawdiyotho l’Mor Gewargis Tlithoyo Sliwa cali mşablonutho citonoyto dsımle ba n’ışne dşaficina, u tlıbla ste ma n’abne di cito dımsalın l’aloho laşan dımcadır a’hsayo di Sunados dımnaqın fatıryarxo hatho li cito d’Madınho d’Othuroye.