Mqafe hlilo ğnizo tahte bayto bi qritho d’Başbük d’Turkiya

A mşale Turkoye kşıflın u sistemano da hlile dkıtyo 30 metrowiye tahte di arco d’bayto d’2 taboqe, bu zabno dhın farsufe gnıwolın athare mene. Hathe hawyo celtho, dmitabde hfaryotho bnişo dmitaxlıso i dukthathe ma tenhibe.

U sistem da tunnelani nafıq li holo bıthır ma buhone dsimi, dıkucri l’meqım alfayo d’eşne-lu zabno di mamlaxtho dan Othuroye. Ba şurone du hlilano, kito rşome leşan u iqoro dan alohathe; beynothaye lu aloho du mattro uda calcole, lu aloho du sahro uli alıhto di barake uğer.

Bıthır ma buhone dsimi cali dukthathe mawdıc; Bu zabno di mamlaxtho Othuroyto dkıtwa haylo folitiqoyo rabo bu tayman madınho d’Anatolia, a hiğmone Othuroye mahwanwo u haylathe bu darbo di amnorutho uda rşome. Hın ma kthawotho dımqafın’ste bu leşono Oromoyo’ne u kımahkın cala haye du zabnawo.

Ba buhonani’ste qadiri an arkeolog dımfaşqi kthawyotho dıkmahkın calu mşalo Mukin-Abua dıkhoye’wo bu zabno du malko Adadnirari III beyn 811-783 meqım me Mşiho. U farsufano qayıthwole i mşalutho di mdabronutho du qlimano wi duktho dımqafyo ucdo, mıstacmewola xıd nuqazto.