Mşarelın alqoyotho du Mawtbo di Athto d’Suriya

İ mcadronitho di rişonutho du mawtbo mşablono di mdabronutho yothoyto du garbiyo udu madınho d’Suriya Elizabet Gawriye, mawdacla da tarmiyotho kaboşe dı Turkiya kmacişi ahayle marıhbone, ubu darğo qadmoyo kmaydi i athto nişo laşaneye.

 Gawriye, bu mamlo dsımla adyawma bu futoho du lqoyo du mawtbo di athto d’Suriya, sımla qroyto la neşe dhowın b’awyutho camıhdode, laşan dmıbne u athro d’Suriya calu asas di barmothoyutho.

Adyawma bi mditho d’Camuda bu garbay madınho d’Suriya, mtayıb u lqoyo du mawtbo di athto d’Suriya, bnişo dmıdroşo i aykanoyutho da neşe wu dactidaththe bu telolo da 9 ışne du kriz d’Suriya. Lu lqoyano mıştawtafle 100 hadome du mawtbo di athto d’Suriya ma came u fenyotho mşahılfe du athro.

İ mcadronitho di rişonutho du mawtbo mşablono di mdabronutho yothoyto du garbiyo udu madınho d’Suriya Elizabet Gawriye bu mamlo dsımla bu lqoyano mırla “şafıc 9 ışne calu kriz trajidi d’Suriya, u hawi celtho dı teşniqe la gabre u neşe d’Suriya. Wu medano hawi bnişo dmitafiti la haye atarmiyotho da hayle tuhmonoye şovenist dkıbci dıturi u sebyono da Suriye. Mawxa klozım ahna dımdawmina u ağuno wu diyalog laşan dmotina la nabne u neşe d’Suriya kulle”.

Gawriye bu mamlayda grışlaste u zuhoro cala tarmiyotho kaboşe dı Turkiya dhawın celtho li golutho d’olufe ma bnaymothoye d’Suriya, u mırla; A tarmiyotho kaboşe dı Turkiya kmacişi ahayle marıhbone, ubu darğo qadmoyo kmaydi i athto nişo laşaneye. Be bzabno, Gawriye mawdacla da neşe d’Suriya kcayşi mu şuroyo du kriz b’aykanoyutho mahişonitho mfothıd di golutho, uhula xıd mathlo a neşe Ezidoye u Suryoye-Othuroye dlayto hulucdo mawdconutho cali ctiduthaththe.

Camagbıdathe, Gawriye mahkela calu dawro dıkmıştacyole i athto bu haqlo kenşoyo u folitiqoyo, u makadla dlo mi methkasonutho di athto lıgıdmihalaqwo dawsat mşawşıte bu garbay madınho d’Suriya. Bıthır mu mamlo d’Gawriye, fris sinevizyon cala dyoşe dhawın bhaq di athto d’Suriya, wu mrodo wa zoxuwotho dımhaqaqla bu zabno da 9 ışne du kriz d’Suriya.