Mtayıb knuşyo cama came bi fnitho d’Tel Tamer

A rişone da caşıryotho di fnitho dı Tel Tamır bu garbay madınho d’Suriya cam mathlone mu camaydan uda Kurdoye, bu knuşyo dımtayablın sımle qroyto dmitabde diyalog du droşo bayn di mdabronutho yothoyto wi şultonutho d’Suriya. Be bzabno, amıştawtifone lu knuşyano bu buyono dıfrıslın lu tboco froso makadlın du şroyo du kriz d’Suriya laybe dhowe dlımişatıs athro demoqratoyo lo qentrunoyo, athro dıkmoyıd asas l’ruhe a’zedqe ruşmoye da came umthoye u tawdithoye mşahılfe.

Bu insiyativ di sictho da caşıryotho du garbiyo udu madınho d’Suriya, ubi sdirutho dcamu qentrun da nesore gawonoye da haylawotho d’Suriya demoqratoyto d’QASAD udu mawtbo di qastra dı Tel Tamır, mtayıb athmıl knuşyo rwiho la rişone da caşıryotho Caraboye u mathlone du camaydan u Suryoyo-Othuroyo wa Kurdoye dı Tel Tamır. Lu knuşyano mıştawtafleste menyono ma rişone da caşıryotho Caraboye dı Der Alzor udi Şaddade, bnişo dmitahwe la caşıryotho u dawro dkıtwolın meqım bi fnitho, udmitahıt ido bido mqabıl da hayle kaboşe, udrişiste bu knuşyano hın ma sebwotho folitiqoye u folhoye.

Bu huthomo du knuşyano, a’mıştawtfone frıslın buyono lu tboco froso dıqre mu rişono zawgoyo du gabo Othuroyo Demoqratoyo dı Tel Tamır Şamcun Kako.

Bu buyonaththe, a mıştawtıfone makadlın du şroyo du kriz d’Suriya laybe dhowe dılo mu bnoyo d’athro demoqratoyo lo qentrunoyo dıkmisım ebe u garanti da zedqe ruşmoye da came mşahılfe du athro. A mıştawtfone makadlınste dıkrıfdi kul şıkıl d’kboşo dilonoyith u kboşo dı Turkiya uda çatawiyayda.

Be bzabno, u buyono makadle i ruşmoyutho da haylawotho d’Suriya demoqratoyto d’QASAD bi mudafaca ubu huroro da narcotho, u tlıbleste dmitabde diyalog jıddi bayn di mdabronutho yothoyto wi şultonutho d’Suriya.

Camgabıdathe, u buyono tlıble dmitaqwe u dawro makthabzabnoyo da caşıryotho bu sutoro da timoyotho athronoye u kenşoye, u rfıdleste dmıxlıq hayle da mathhabe awste hayle etnikoye dıkmohın darbo li mlahmonutho kenşoyto. Ubi harayto dkulle, u buyono makadle dıklozım aşutose di mdabronutho yothoyto dımsanti la talabe du kenşo, udnıfqi mqabıl du fasad udi rişonutho awkith i zacame dkito b’gawıd di mdabronutho yothoyto.