Mtayıb u cadcido du cedo du Slibo bi qastra d’Telesqof bi daşto d’Ninwe

Bi qastra d’Telesqof bi daşto d’Ninwe, mtayıb u cadcido du cedo du Slibo qadişo dgımdawım tışco yawme.

U cadcidano dımşarele b’turnuwa di esfireğlo, gıdmdawım cam halxe, zuyohe, slawotho u hfitwotho hrene di amnorutho.

Bi cohnutho du cedo du Slibo, i marcitho di cito d’Mor Gorgis di qastra d’Telesqof di daşto d’Ninwe, mtayabla 6 bu yarhano cadcido rabo dgımdawım hul 14 bu yarho. İ tahrazto du cadcidano dkıtyo rwihto kmişaklo me hfitwotho ruhonoye, du sport udi amnorutho.

A fulhone du cadcido du Slibo d’Telesqof mşarelın yawme d’Tre dşaficina bi turnuwa hmişoyto di esfireğlo dımtaybo mi sictho du sport d’Mor Gorgis. Li turnuwathe kmıştawtıf 8 gude dıkmıştacın bu wahdo di Hubo di esfireğlo b’Telesqof. U muroyo qadmoyo dımtayıb beyn di gudo du Lqoyo di İqartho wi gudo du Şlomo, tayım u zabnayde u şerşoyo b’6 ğolat dımhalaqe a gude.

Ubıthır mıd mawrıx u muroyo, i gudo du Şlomo qmırla 4 mqabıl d’2 ba penaltiye.

Yawme d’Tlotho dşaficina, sim u muroyo trayo beyn di gudo d’Sohduna wi gudo di claymutho d’Mor Gorgis d’qmırla 9 mqabıl d’3 ğolat. U athmıl’ste bu muroyo dımtayıb, qmırla i gudo d’Mor Afrem b’3 ğolat mqabıl d’ğol dımhalaqla i gudo d’Mor Yacqub. Lfuth i tahrazto du cadcido, gıdmitayıb 13 bu yarhano slutho, halxo u zuyoho.

14 bu yarho a gude mşahılfe da korale di daşto d’Ninwe gıdmıştawtıfi l’ramşitho ruhonoyto da qole citonoye. Camgabıdathe, bu cadcidano kmisomi a muroye du Slibo şafiro dkulle dıkmitahti lalcıl da bote du camaydan b’Telesqof. Mawxa a comure di qastra kımşadri ucdo vidyowiye u surotho da slibaththe li dafo di marcitho d’Mor Gorgis yaste li sictho du tbocofroso di marcitho, wu farsufo dgıqathle u menyono celoyo da laykat gıdqomır a muroyani du Slibo şafiro.