Mtayıb u lumodo şbicoyo da şbile du leşono Suryoyo u di tarbitho tawdithoyto Mşihoyto

İmdabronutho gawonoyto du yulfono Suryoyo bu Iraq, mtayabla u lumodo şbicoyo da şbile du leşono Suryoyo u di tarbitho tawdithoyto Mşihoyto bi mıştawtfonutho da mdabrone da ferce di mdabronutho gawonoyto wa mşale da kıthowe du leşono Suryoyo u di tarbitho Mşihoyto cam menyono d’malfone.

 Bu lumodano, a mıştawtfone dımqadamlın buhone calu leşono Suryoyo mbayanlınste menyono d’fusqone laşan u şuşoto du yulfono Suryoyo wi tarbitho Mşihoyto.

 Bu nişo “aşbilaydan a’Suryoye kmacımqi i haymonuthaydan i Mşihoyto, i mdinoyuthaydan wi hiyoyuthaydan”, i mdabronutho gawonoyto du yulfono Suryoyo bu Iraq mtayabla lu mıhreno, u lumodayda da şawco da şbile du leşono Suryoyo u di tarbitho tawdithoyto Mşihoyto. U lumodano mtayıb bu darbo di dafo du nawlo d’Mor Afrem, bi rocyutho du waziro di tarbitho du Iraq Cali Aldulaymi.

Lu lumodano mıştawtafle u mdabrono gawonoyo du yulfono Suryoyo Cimad Jajjo wi mcadronithayde Nidal Matti, amdabrone da ferce du yulfono Suryoyo bı Boğdod, b’Kerxıslox, b’Ninwe u b’Albasra, amşale da kıthowe du leşono Suryoyo u di tarbitho Mşihoye wa malfone da hiğmonwotho dıkmitawlıfi ebaye akthowani.

Bıthır mu mamlo du futoho, Cimad Jajjo mqadamle buhono bu ışmo “i methhaşhonutho du xtuto macırboyo bu tewlifo da talmidhe dıkmıjğoli bu leczo madınhoyo”, bıthır mathe Nidal Matti mqadamla buhono hreno bu ışmo “adarbone du tehrigo du leşono Suryoyo”, wi mşalonitho di tarbitho tawdithoyto Mşihoyto Rayya Basem mqadamla u buhonayda bu ışmo “qayyo u teşniqo?”. Bebzabno, u malfono du leşono Suryoyo Samer Alyas bu buhono dsımle mqayasle şıklat mşahılfe ma herge du leşono Suryoyo du dacbar u ducdo.

Bıthır ma buhonani, ftih u darbo la nuqoşe u la şuwole dımcatarlın u lumodo u dımfanele aclaye Cimad Jajjo.

Bu huthomo du lumodano, amıştawtfone mbayanlın menyono d’fusqone, baynothaye dmitahıt yuqro cali sbutho du tewlifo du xtuto macırboyo u madınhoyo du leşono Suryoyo ba madraşyotho, u dmitayıb dawrat laşan u şuşoto da malfone hathe du leşono Suryoyo u di tarbitho Mşihoyto.