23/04/2021

MUB frısle buyono bi cohnutho da 106 eşne du qtolğenso da 1915

U Mawtbo Umthoyo d’Bethnahrin-MUB, frısle adyawma buyono bi cohnutho da 106 eşne du qtolğenso barbroyo dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dbritho.

Bu buyonano i Sictho di Rişonutho d’MUB kımmo; Hani 106 eşne, kımdawım heş u tenkiro du Sayfo dan 1915.

Bu şuroyo du buyonano dfrısle u Mawtbo Umthoyo d’Bethnahrin, kımahke cali falsafe d’Turkiya dkıtyo snıtto li tuhmonoyutho di mamlaxtho da Cuthmanoye ulu ideloji du tukoso d’İttihat Terakki ubu şıkılano, kımdawmo Turkiya dmankıro u qtolğenso dsımwo cala came Mşihoye ban 1915. Turkiya kıtla sistem dlıkmaqbıl a hiyoywotho wa haymonwotho hrene ubebzabno lıkloqe fotho b’fotho bu makthabzabnayde u catumo wu qento d’qtolğenso hatho kımdawım.

U nişo du tenkiro du qtolğenso, dmitatimi hani dmaxlasse mene’yo wa citotho, a dayre wa remze marduthoye u makthabzabnoye kmılhoyi, aw kmişalıfi l’masığde, ğer trın dmıshofi aw dmıtıstacmıli xıd stabıl da haywotho uğer manhıbi. Me gabo hreno i siyase dıkmitaşyo mi şultonutho d’AKP u MHP kmarwıho i zıhniye du qtolğenso. U nişo da hçome wa mudaxalat dıkmisomi calu garbiyo ucalu madınho d’Suriya, cal Afrin, cal Şigor wi daşto d’Ninwe du Cıraq, dmılhoyi a gawne frişe dkito bu qlimo’yo.

MUB komır; B’Turkiya kito nahire u farsufe demoqratoye dıkmawdın bu qtolğenso dan 1915 ya b’qolo celoyo yaste şalyo, elo bu şıkıl dıksaymo i şultonutho falqo rabo mu kenşo kımdawım bu tenkiro du qtolğenso, bu şıkılano ksaymi hawbo rabo mqabıl di noşutho udu makthabzabno. I mawdıyonutho dan athrawotho wa şutose, tukose frişe, kıtla ulsoyutho rabtho bu nfoqo du moro la timoyotho noşoye. Hol dlo mitawde bu qtolğensano, laybe dmişakıl haymonutho b’Turkiya u laybeste u qento du qtolğenso dmitaqım mi holo.

MUB mırle; Bi cohnutho d’24 Nison kmathkırina a Sohde da came Mşihoye kulle dmafiti mu qtolğenso dan 1915. Xıd Mawtbo Umthoyo d’Bethnahrin kkurhina a hayle Turkoye, Kurdoye, Caraboye, Çarkazoye wa hrene dmıde duktho bu qtolğensano bu ışmo du jihat. Ksaymina qroyto la nahire, demoqratoye, lkull noşo dıksonıd i hirutho dşufci li harake b’Turkiya, b’nişo dımcalçi a jurhe du dacbar u dbonın kenşo demoqratoyo. B’iqoro kayfina rişayna qum da Sohde du Sayfo dan 1915, gıdmacışina u cuhdonathe u cama came gıdmaglena cali şrorutho u kobina şudoyo, dgıdobina ağuno leşan dmaglena cal kull şıkıl d’hbose u dyoşe dkowın calu camaydan.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…