MUB frısle buyono bu duxrono şatonoyo du qtolğenso da 1915

U Mawtbo Umthoyo d’Bethnahrin-MUB frısle buyono bu duxrono şatonoyo du qtolğenso mayiro dsim calu camaydan bi şato dan 1915. Bi rişitho du buyonanoste kmitawmır; U ağuno leşan u Sayfo, caşıntır gdımdawım!

 MUB mırle; Uqtolğenso dsim mqabıl da came Mşihoye, camgabe dmaqbıl me hın athrawotho u şutose, elo ğalabe man athrawotho dıbritho lo mıctarafe ebe wu medano caybo raboyo leşan di noşutho.

 İsictho di rişonutho du Mawtbo Umthoyo d’Bethnahrin ba melani kımşaryo u buyono dıfrısla bi ohnutho du duxrono du Sayfo dan 1915; Şafıc 105 ışne calu qtolğenso dsim calu camo Suryoyo-Othuroyo-Kaldoyo-Oromoyo ban 1915. Tıre mılyune u falge dıbnaynoşo Armınoye, Rum Pontusoye mu camaydan qtili, u mahıtwo nişo dmitatimi bnaqla hıdo. Cıl mıd dkito tahwiyotho wi şarirutho du qtolğensano dkıtyo qrıhto, i zıhniye dkıtyo du qtolğenso wa more di siyase kmankırile.

 MUB komır; Ba qedome tuxmonoye, tawdithoye udi frişutho, xliq nafre u bcelıdbobutho beyn da came uda tawdiyotho, u mhaydır arcoyutho leşan du qşoco da Mşihoye. İ Mamlaxtho Cothmanoyto a şutosayda, dımşakli ma caşıryotho Kurdoye, a qatole wa ganowe dkıtwın ba hbuşye mıstacmıli leşan dsaymi u qtolğenso. Mu qtolğenso dan 1915 hol adyawma, leşan a timoyotho etnikoye, tawdithoye wa hiyoywotho d’Turkiya dmıqşoci, mşakıl siyase sistematik dkıtyo calu asas du asimilasyon, di golutho udu tehriwo. Mi cılthathe a came d’Turkiya matın qum u qşoco. İ siyase di şultonutho dıkmahwiyo dkıtyo, hula ışne da 2050 dılo mıtre hiyoyutho, tawditho u mardutho frışto.

 MUB mırle; U qtolğenso dsim mqabıl da came Mşihoye camgabe dmaqbıl me hın athrawotho u şutose, elo ğalabe man athrawotho dbritho lo mawdelın ebe wu medano caybo raboyo leşan di noşutho. U ağuno dkobın a came Mşihoye dmafiti mu qtolğenso kibe dlowe makfiyono, elo an athrawotho wa şultonwotho kıtte wolitho dmanhıti la haye i mşalutho dkıtte mqabıl di noşutho. Xıd Mawtbo Umthoyo d’Bethnahrin kmaczımina a şultonwotho kulle, wa şutose dkıtlın asirutho wu ray dbritho kulle dmawdın bu Safo da Suryoye 15 Hziron u leşan di şultonutho d’Turkiya dmıctarfo bu qtolğenso dan 1915 dşufci li harake.

 Bu huthomo MUB mırle; Bu ağuno dhuwlan hani eşne, glelan cali siyase du tenkiro du Sayfo, mmnaselan dmawdıcina u trajedi du camaydan l’britho u dmaşmıcina u qolayde. Leşan dmitıctarıf bu Sayfo, klozım a şutose, tukose folitiqoye, tawdithoye u kenşoye du camaydan kulle wa farsufe dşufci li harake. Kısaymina qroyto la falqe du camaydan kulle dobın zıttır ağuno leşan dmınfıq moro lu Syafo ula sohdeyde, dmıtlıb hşowo ma qatole, wa hayle Emwothoye dmawdın bi şroruthathe u dmitagle cali siyase du hboso udu tenkiro dcalu camaydan. Hol dmitıctarıf bu Sayfo, u ağunaydan gıdyorıw zıttır camu camaydan, gıdqowe zıttır u gıdımdawım. Naqla hreto b’iqoro kmathkırina a Sohde du Sayfo, i masiruthaydan ba uhdonaththe u şudoyaydan leşan dmamtena u ağuno li zoxutho’yo.