16/02/2025

MUB hadir b’taglitho leşan i hirutho di Öcalan. “Dlo mi hirutho d’Öcalan udi mawdyonutho ba came frişe d’Bethnahrin, latyo mumkun dmımte l’demoqratoyutho bu Madınho Mescoyo”

Hani zabno, kımtayıb u camo Kurdoyo hfitwotho mşahılfotho leşan dmahwe u ruğzayde mqabıl du komplo Emwothoyo dsımwo calu rişonathe Abdullah Öcalan meqım 26 eşne. Athmıl bi mdito d’Strasbourg d’Fransa, mıştawtaflın ba casro alfayo dıbnaynoşo li taglitho dsimo bu ışmo; Hirutho l’Öcalan, şfroyo folitiqoyo lu şwolo da Kurdoye’. Bi taglithathe’ste, hadır athmıl mınyono ma noqufe u hadome du Mawtbo Umthoyo d’Bethnahrin.

16/02/2025

STRASBOURG, Fransa – Bı mıştawtıfonutho celoyto d’camo Kurdoyo, folitiqore u farsufe Urifoye sanode di demoqratoyutho, mtayıb athmıl taglitho rabtho bi mdito d’Strasbourg d’Fransa u tlib dmitarfe u rişono Kurdoyo Abdullah Öcalan, dımsıkwo b’komplo Emwothoyo dsımwo acle 15 bu yarho d’Şbot dan 1999 b’Kenya u bıthır maslamwo l’Turkiya.

Mu zabnawo uholucdo, Öcalan bu hbuşyo d’İmralı’yo wa Kurdoye kull şato, bı qaşyutho kıkurhi u msokano du rişonathe ba hfitwotho dıksaymi b’mdinotho u athrawotho frişe dbritho b’şıkıl kampanya global. Ba mamle frişe dsimi bi taglitho d’athmıl me mşale d’gabe u şutose u folitiqore Kurdoye u Urifoye, tlıbbe dmitarfe Öcalan u dmisafe u şwolo da Kurdoye. Bha ma mamle dsim athmıl’ste mawdıc, du komşlo Emwothoyo dsımwo, lo mati lu nişayde, cal du camo Kurdoyo mdawamle u mrodayde.

U şwolo da Kurdoye lıkmisafe, dlo mi hirutho d’Öcalan u tlib bebzabno, dmitaqım u izolasyon du rişonathe b’Turkiya. Bu tarano’ste mınyono ma noqufe u hadome du Mawtbo Umthoyo d’Bethnahrin hadiri i taglithathe d’Strasbourg xıd awyutho u snodo la talabe dımqadmi leşan i hirutho d’Öcalan, leşan i demoqratoyutho u terkiwo du şlomo udi mşaynutho b’Turkiya u gawonoyith bu Madınho Mescoyo kule.

U hadomo di Sictho Mdabronitho d’MUB, Şlemun Rhawi sımle mamlo di awyutho la hadire wu qrele u buyono dfrısle u Mawtbo Umthoyo d’Bethnahrin bi cohnutho da 26 eşne du msoko du rişono Kurdoyo. Bi egarthathe MUB mırle;

“Xıd came b’Turkiya ubu Madınho Mescoyo, klozım dobina aguno ido bido u dsuxrina kamiloyith a tarce dftıhhe a hayle faşist diktatör bu Madınho Mescoyo bnişo dmızrıc bzarco d’mardutho du şlomo.

Kısaymina qroyto lu kenşo Emwothoyo ula şutose u tukose d’Urifi, d’Emwotho Mhaydotho ulu Vatikan dmaydi tedbire leşan i hirutho d’Öcalan-dkıtyo hawro yaqiro lu camo Suryoyo Othuroyo Kaldoyo Oromoyo u mdafcono da haye mşawtıfe.

Dlo mi hirutho d’Öcalan udi mawdyonutho ba came frişe d’Bethnahrin, latyo mumkun dmımte l’demoqratoyutho bu Madınho Mescoyo.

Tihe lu ağono du camo leşan haye mşawtıfe ubı mşawyutho.”

Laltax i egartho bu Turkoyo di MUB di qaryo bi taglitho: