Muhammad Allawi griş mi wolitho dımşatıs şıltonutho du Iraq

Muhammad Allawi dhuwo ele wolitho dımşatıs i şıltonutho du Iraq  lı qadır dımşatasle u bi harayto maslamle i mşalutho dkıtwole dlo şutoso di şıltonutho.

 Bu şıkılano u qatro du şekolo di şıltonutho du Iraq kımdawmo bıthır mıd mşarewola bi şato d’şaficina cama hfuxye da mtagılyone.

Bi şabtho dı şaficina a falqe da Sunna u da kurdoye mahwewolın u hfuxyathe mqabıl du şekolo di şıltonutho dkobıc soyım Allawi. Elo mawdacwo dıgdowe ğuboye bu parlemento bıthır mıd mwaxarwo yawme dı hamşo d’Şaficina.

İsbutho di şıltonutho du Iraq mşarewola bi şato d’şafico bu yarho da teşco inaqa da mtagılyone sımwolın tagılyotho u tlıbwolın i isticfa di şıltonutho dkıtwa bi rişonutho du rişwazire Adil Abdulmahdi. Bıthır mi isticfa di şıltonutho u rişqutno Braham Salıh kımnase dımqafe noşe dkibe mşatıs şıltonutho, u be bzabno a mtagılyone dhowın tıhnihoye mu farsufo dgımbayın u rişqutno.

U rişqutno Barham Salıh huwole meqım yarho i mşalutho du syomo di şıltonutho  l’Muhammad Allawi, elo hiyesti bıthır me droşe dhawile cama gabe u falqe dkito bu athro mawdacle dlaw kibe mşatıs şıltonutho mawxa madcarle i mşalutho dkıtwole lu rişqutno naqa hreto.

Bu şıklano u rişqutno du athro du Iraq Barham Salıh klozım mnaqe farsufo hreno  laşan dımşatıs şıltonutho lu athro.