Muna Yaqo mraşho li wolitho d’rişonitho di sictho şritho da zedqe noşoye du qlimo d’Kurdistan du Iraq

İ yadıcthonitho du camaydan bu haqlo du qonuno udu huquq Muna Yaqo, mraşho li wolitho d’rişonitho di sictho şritho da zedqe noşoye du qlimo d’Kurdistan du Iraq.

Yaqo dqayıthla darğo du professor bu haqlo du huquq, kmısnodo mu koalisyon di hdoyutho umthoyto du camaydan bu parlamento d’Arbil.

U rişono du koalisyon di hdoyutho umthoyto du camaydan bu parlamento d’Arbil Ano Jawhar Cabduka, bu buyono dıfrısle lu tboco froso mawdacle dhınne xıd koalisyon da qoyume du camaydan, ksındi i mraşhonutho d’Muna Yaqo dkıtyo yadıcthonitho bu hqlo du qonuno udu huquq laşan dmitahwela i wolitho d’rişonitho di sictho şritho da zedqe noşoye du qlimo d’Kurdistan du Iraq.

Yaqo dkıtyo mraşahto mdarbıd du rişono di sictho ducdo Diyaa Bıtrıs, kmıntır dmisım ramhıl quwolo cali mraşhonuthayda bu parlamento d’Arbil.

U rişono du koalisyon di hdoyutho umthoyto bu buyonayde, mqadamle ste tawdiyotho l’Bıtrıs cali mşablonutho dsımle lu qlimo d’Kurdistan bu haqlo da zedqe noşoye.

Muna Yaqo kmıhşowo i athto qamayto mu camaydan u Kaldoyo-Suryoyo Othuroyo dqayıthwola meqım tre yarhe, u darğo dı professor bu haqlo du qonuno udu huquq bu Iraq.