Mustafa Alkazimi sımle socurutho lu qlimo d’Kurdistan

I wazirto di galwoyutho bi şultonutho du Iraq İvan Faeq Jabro, sımla socurwotho li qastra d’Batnaya di daşto d’Ninwe u li qritho d’Kojo dkıtyo bi fnitho d’Şigur bu garbiyo du Iraq. Jabro ba socurwothani, mawdacla dımşarela i tarmitho du bnoyo u hethotho da fenyotho d’shifi bi daşto d’Ninwe u bi qastra d’Şigor.

 Me gabo hreno, u rişwazire du Iraq Mustafa Alkazimi sımle socurutho li mditho d’Arbil, u hawile ytawyotho cama mşale du qlimo d’Kurdistan.

 I wazirto di galwoyutho bi şultonutho du Iraq İvan Jabro, athmıl cam taşdarto sımla socurutho li qastra d’Batnaya bi daşto d’Ninwe, u laqyo u kohno di cito d’Mor Qıryaqos qaşişo Aram Hanna. I taşdarto d’Jabro kmişaklowa mu waziro du tuyobo da tarmiyotho Xalıd Alnajım wu hiğmuno d’Ninwe Najım Aljabburi.

Jabro dkıtyo mu camaydan di cito Kaldoyto d’Bobel, bi socuruthayda mawdacla dımşare bu tuyobo di tahrazto mşawtafto di tarmitho du bnoyo u hethotho da fenyotho dıshifi bi daşto d’Ninwe u bi qastra d’Şigor bu garbiyo du Iraq. Jabro mırlaste; U nişo di tarmithathe dmitacış u sabro me hatho ba lebawotho da comure d’Batnaya, u dmisım u garanti dhowelın dactid towo bi fnithoyo.

Bebzabno, Jabro makadla di wazirutho di galwoyutho b’fusqono kamiloyo dımcadro agalwoye bu dcoro la dukothathe u dfayşi masre ba waridathe a makthabzabnoye. Camgabıdathe, Jabro sımla athmıl socurutho li qritho d’Kojo dıshifo mu tukoso marıhbono d’Dacış, u bi socuruthayda makadla dıksındo u dcoro da galwoye li fnitho, dmibayın şartat towe di ciyeşe la comurayda, u dmisım  u bnoyo da fenyotho dıshifi bi qastra d’Şigur. Jabro sımlaste u futoho d’makıthbo da galwoye b’Şigur, bnişo dmisomi a warqe di ruşmoyutho da comure di duktho.

Meqım mathe, u rişqutno du Iraq Barham Salıh mıstaqbewole yawme dıtre dşaficina b’Boğdod, i wazirto di galwoyutho İvan Jabro. U bi ytawtathe, u rişqutno du Iraq makadwole dıklozım dmısnodi a fulhone, u dmibayni a mkone du dcoro da galwoye l’Şigor u li daşto d’Ninwe, u makadwoleste dıklozım i sbutho di galwoyutho dtaymo bu Iraq.

Mxasra hreto, u rişwazire du Iraq Mustafa Alkazimi sımle adyawma socurutho li mditho d’Arbil cam taşdarto mi şultonutho b’darğo celoyo. Bi socuruthathe, Alkazimi mtayable knuşyo cami şultonutho du qlimo d’Kurdistan bi rişonutho d’Masrur Barzani, bnişo dmıdroşi a şuşote haroye wa qetre dıkmdawmi heş beyn di şultonutho qentrunoyto d’Boğdod u di şultonutho qlimoyto d’Arbil.I socuruthathe i qamaytoyo dıksamla Alkazimi lu qlimo d’Kurdistan mu zabno dımnaqe rişwazire hatho li şultonutho du Iraq.