10/05/2021

Nafıq taxtuşe beyn da Fleştoye u du polis İsraloyo bu masığdo d’Alaqsa

Nafıq liholo taxtuşe hathe bayn da powelıs İsarloye wa Fleştoye bu masığdo d’Alaqsa bi mditho d’Urışlem.

 Lfuth BBC, ba taxtuşani zıd m’200 farsufe mçarhi.

 Adyawma meqım mdımşare u halxo şatonoyo da othwotho du yawmo d’Urışlem dımtayıb ma mothonoye d’İsroyel, hawi taxtuşe hathe qaşye bayn da powelıs İsarloye wa Fleştoye bu masığdo d’Alaqsa b’Urışlem.

Ba taxtuşani a’Fleştoye mhalaqlın kefe cala haylawotho di mşaynutho d’İsroyel dhınne ste mhalaqlın foqucwotho du qolo cala Fleştoye. Lfuth u ajans d’BBC ba taxtuşan dhawın adyawma mçarıh zıd m’200 farsufe.

Bebzabno, mabuce Fleştoye lawğıl du masığdo d’Alaqsa mawdaclın ba casrowat d’Fleştoye hniqi mu duxxono da foqucwotho u mçarhi ba buğre lo qatole dmarıs aclaye.

U cnufyo qaşyano athi luhwoyo bıthır mıdşafıc yarho calu şğuşyo dhawiwo, cal du bethdino İsarloyo fsıqwole dmitawfıq yaqrotho Fleştoye m’tlotho bote dkıtne bi şawtho d’Şex Jarrah b’Urışlem i madınhoyto, udmitahwın la İsarloye.

Adyawma ste u Mawtbo di Mşaynutho d’Emwotho Mhaydotho kmıntır dloyım, laşan dıdorış u kriz haroyano dkımdawım bayn da İsarloye wa Fleştoye.

U gayso d’İsroyel frısle ste adyawma ba olufe d’powelıs b’Urışlem i catıqto, cal da mothonoye İsarloye kımhalxi adyawma ba zabuqone d’Urışlem i madınhoyto ukmathkıri u yawmo d’mahıtwola İsroyel ido cali mditho catıqto meqım 54 ışne.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…