Nafıq yuqdono ba arcotho d’Hassana

Athmıl ba şoce d’casriye yaqidi a turone wa arcotho d’hedor i qritho du cameydan Hassana dkıtyo b’Şırnax d’Turkiya.

 Bi mawdconutho dmalımlan mu tbocofroso, i nurathe mdawamla hola şoce du lalyo u mawqadla an arcotho wi marca dhedor qritho wu kıtwo qento rabo dcıbro li qritho. Xıd kull naqla, a mşale di şultonutho fayişi mfarjone.

 Ha ma farsufe dkıtwe bi qritho dımnasele dmatfe i nurathe mawdacle, di nurathe dımşarela b’rahuqo b’3 kilometre mi qritho, kıtwo zuctho dımawqdo a botayda. I qritho d’Hassana dkıtyo du cameydan bu madınho d’Şırnax, kull zabno kito hedora taxtuşe beyn du gayso Turkoyo udu gerilla di PKK-metul dhedora kule turone casye’ne.

U farsufo dkiban mahtina ışme Şamcun komır; Hzelan dqdiho nuro bruhqo dkmo kilometre mi qritho u kalina u lo hzelan noşo mi şultonutho aw ma şbobe da qıryawotho hrene u loste mi jandarma lathi lafelayna wu lawi mamlo bhaq di sbuthathe. Bıthır ahna dkıtna bi qritho ba mkonaydan mnaselan dmatfina i nuro mdawamla holi şoctho da 12 du lalyo.

U farsufano dkıtyo ma abne du cameydan komır; Camhbol latyo hano komplo qamoyo dıkmisım cali qrithathe u latyo u haroyo. A farsufe dkıtne bıthre du komplano me Aloho dhozın u funoyathe, metul du ha dmawqadle i qritho mawqadle i noşutho. Ahna lfuth a mkone dkıtlan, matfelan i muro ubu zabno du tetfiyo, ha man abne du cameydan mçarıh ışmo.

Bi mawdconutho dkobe u Şamcun komır; Aloho lo mahwele u medano l’noşe. Ahna kıhozina i nuro kıthyo cala bote u kibe kull qatinto dmıtyo i nuro la bote.

Idicoyo bi fnithathe ubi qritho d’Mahre’we dhtifo’wa i iqartho d’be Diril u bıthır dımqafyo i mnohto Şmuni qtılto u heş layto tebo cal Hermız Diril. Bi sbuthathe’ste holucdo a hadome di iqartho kımahwın hfuxye la mşale di duktho-di şultonutho lıksaymo mede leşan dımqafyole.