14/09/2020

Nafiqo i netije da guboye da karxıwotho d’Nord Rhein Westfalen

A netijat da guboye qlimoye bi marcitho d’Nord Rhein Westfalen (Nord Reyn Westfalın) d’Almanya nafiqi.

 Ba guboyani dkıtwın qlimoye, kıtwo mraşhe Suryoyestene.

 İ mditho dı Gronau d’Almanya, cabır 3 hadome Suryoye lu Mawtbo di karxutho u 3 Suryoyestene lu mawtbo di mlahmonutho di mditho.

Athmıl dkıtwe yawme d’Huşabano, simiwo a guboye qlimoye bi marcitho d’Nord Rein Westfalen d’Almanya.

Ba guboyani abnaynoşo huwlın a qolathe leşan dımnaqın a hadome da mawtbe da karxwotho yacni da baladiyat u hemstene a hadome da mawtbe di mlahmonutho dıkmıqroyi “İntegrasyon Raat” mawtbo di mlahmonutho.

Hem li mdabronutho da karxwotho da belediyat u hemstene da mawtbe di mlahmonutho dkımminalın “İntegrasyonsrat” cabır mraşhe Suryoye. Bi mditho dı Gronau d’Almanya, sımwo fulhono sbiso leşan a guboyani.

A Suryoye, bi mşablonutho u bu snodo di cito d’Mor Eşacyo dı Gronau, mşajacwolın u camo dmıştawtıf u dobe a qoleyde ba guboyani.

Lfuth i mawdconutho dmatilan ma mraşhe da Suryoye ba guboyani Afrem Gök, kıtwo 5 farsufe Suryoye mraşhe li karxutho dı Gronau. Ma 5 farsufani:

Antonio Josefs Be Hıtle mu gabo d’FDP (Ef De Pe),

Abrohom Savci mu gabo d’CDU (Se De U),

U Aram Bısso mu gabo d’CDU (Se de U) cabiri lu mawtbo di karxutho dı Gronauw dıkmişakıl me 46 hadome.

Elo Yusuf Abrohom u Baselios Gezer dımraşahwolın ruheyye xıd farsufe şarye, a qole dmıdlın lo makfelın dcubri li karxutho.

Camgabıdathe, kıtwostene 4 mraşhe Suryoye cama 4 tahlufathe lu mawtbo di mlahmonutho dı Gronau. Lu mawtbo di mlahmonuthostene man 4 mraşhe Suryoye 3 meneye cama tahlufathe qadiri dcıbri. Hanistene: Malfono İshak Aykıl camu tahlufeyde Efrem Gök, Ayfer Aytekin cami tahlufteyda Sare Akan, Stina Jacoub cami tahlufteyda Leliana Merza. A mraşhe Suryoye kulle xıd hıdo lista u bışme du camo Suryoyo mıştawtaflın la guboyani. A Suryoye mıdlın 638 qole u cabırlın 3 mathlone, A Tırkoye mıdlın 640 qole u cabırlın 3 hadome wa Kurdoyestene mıdlın 849 qole u cabırlın 3 hadome li karxutho dı Gronau. Walaw umenyono da Suryoye zıtır ma Kurdoye u ma Tırkoyestene bı Gronau, kmahwe ğalabe Suryoye lo meştawtaflın u lazın dobın a qolathe. Mawxastene a kresi mfaşği beyn da Tırkoye u da Kurdoye dıkcayşi bi mditho.