Pakistan u Hınd m’akadlın, dımatın l’awyutho cal qyomo di şalyuthzayno beyn da tre athrawotho-hem bi naşfe, bi hawa u hemste bu yamo

U rişono d’Amerika Trump mawdacle bi dafayde, d’Amerika mabdela a droşe leşan i şalyuthzayno beyn du Hınd u d’Pakistan u mırle; Bıthır lalyo yarixo d’droşe dsimi bi mdabronutho d’Amerika, fsihoyo’no dmawdacno dhawi ittifaq baroyo dmisım şalyuthzayno beyn du Hınd u Pakistan. Kıtulbina kuşore la 2 athrawotho dmahwelın caqıl u yasifutho la droşani.

Bu zabno du ajans da tebe d’Reuters kımawdıc, du dialog di şalyuthzayno sim mu waziro di baroyutho d’Amerika, u Hınd’ste mawdacle l’AP dımte awyutho dmitaklın a hçome bıthır ma droşani dmıştawtaflelın hol 30 athrawotho frişe u acmaye u waziro di baroyutho d’Britania David Lammy. U waziro di baroyutho d’Pakistan İshaq Dar mırle; Pakistan kull naqla kımçahdo leşan u şlomo u mşaynutho du qlimo-dlo kompromis d’morutho u d’mlahmonutho da thume.

Bebzabno u Hınd’ste m’akadle bi şalyuthzaynathe kıcobır bıgawa’ste a thume oyaroye wu yamo. U tebano fris athmıl bıthır me falge d’yawmo u meqım lalyo, qaşın’wo a taxtuşe wa hçome beyn da 2 athrawotho. Baroyo bıthır mıd mawdıco i şalyuthzayno dhawyo beynothaye, a 2 athrawotho thımlın athmıl hıdode’ste bu dyoşo du qyomano bıthır mıd şmic qolo da furqoce b’Kaşmir. Elo mawdıc’ste, di şalyuthzayno heş kımdawmo ucdo.

A hayle da 2 athrawotho mıstacmelın zayne yaqure mqabıl dhıdode wa 2 gabe’ste d’more d’zayne nukleer’ne. A taxtuşani mşarewolın bıthır me hçomo marhıbono dsımwo bu yarho d’şafıcina cala turist b’Kashmir dkıtyo bu duyoqo du Hınd. New Dehli thımwola Pakistan bu snodo da ğrobe dsımwolın u hçomano, elo i şultonutho d’İslamabad rfıdwola a thomani. Kashmir kıfayşo b’duktho stratejikoyto beyn du Hınd, du Sin u d’Pakistan u kıtla ulsoyutho geopolitik lu qlimo kule. İ watyuthathe beyn du Hınd u Pakistan latne hathe u kıducri l’meqım 70 eşne.