Ramhıl dkıtyo 11 bu yarhano d’İyor, gıdmitayıb hago bi Giessen d’Almanya, leşan u snodo da dıbhe di zalzale dhawyo’wa b’Turkiya ba 2023’yo

GIESSEN, ALMANYA – Athmıl bi tahrazto dilonoyto dımtaybowa harke bu froshezwaydan, klewo cali aykanoyutho da Mşihoye bu Madınho Mescoyo ubebzabno, frışwo duktho’ste bi tahrazto cali sniqutho dheş kıtte a dıbhe di cito da Rom Orthoksoye dım’athriwo mi zalzale dhawyo b’Turkiya 6 bu yarho d’Şbot da 2023. 

Calathe’ste 7 şutose frişe du camaydan mıttafqi camhıdode, dımtayıbi ramhıl 11 bu yarho d’İyor hago, lu snodo da dıbhe du camaydan dhzewolın husrono rabo mi zalzale dhawyo’wa b’Turkiya ubı Suriya. Lu hagano mbayın tahrazto catırto gıdmşare bi şoctho da 14.30 bıthır me falge d’yawmo, udu timo du fetqo’ste b’30 euro’yo.

Bu hagano maczımi a zamore İsa Köskeroğlu, Fikri Hanna, İsa Mityasoğlu u Kamil Hanna ubebzabno, Mitri Sirin u Jens Kreinath gıdsaymi mamle cala gunhani dhawınwo ba 2023. A zuze kulle dgıcubri bu hagano, frişi li xıd mcadronutho lu camaydan d’Turkiya u d’Suriya’yo. A şutose mtaybone du hagano kımaczımi u camaydan di mdito u gawonoyith d’Almanya kula dmıştawtıf acmaye bu yawmano.