Papa Leo XIV tlıble dmisım şalyuthzayno bu Xtuto d’Ğaza. Bebzabno, u mınyono dan athrawotho dıkmahwın hfuxyo lu qedomano d’Isroyel la Fleştoye d’Ğaza kozoyid

VATIKAN / BRITHO – İ qadişutho du Papa Mor Leo XIV sımle athmıl u mamlo di şabtho, lu camo dhadır bu wahdo d’Mor Fetrus bu Vatikan. U mamlano frışle u Papa cali aykanoyutho mahişonitho dıkmdawmo d’Ukraina wu qrobo b’Ğaza beyn İsroyel udu zawco d’Hamas, dımkalaflın a haye dba casro alfayo dıbnaynoşo; beynothaye mınyono celoyo d’nacime.

U Papa bi egartho dqrele lu camo, sımle’ste qroyto l’İsroyel ulu zawco d’Hamas dımyaqri kamiloyith a qonune noşoye u mırle; Bu Xtuto d’Ğaza, a zacqat celoye da emotho uda babone kıcolın li şmayo u kıhudni a şlade zcure da nacimathe qum sadraye. Lani dıktucnitu i mşalutho, kımkararno i qroytaydi-maklewo u qatlo da nacime wa taxtuşani, marfewu a yasire kulle u myaqeru a qonune noşoye.

Bebzabno griş u zuhoro cala Fleştoye dıkhuçmi cala cambare du muklo d’Emwotho Mhaydotho b’Ğaza ubi netiçe nafıq qale beyn du camo u 4 Fleştoye mvayaclın a hayathe u 50 hrene mçarhi. Cali aykanoyuthathe’ste, kull dkothe kızaydi a hfuxye d’athrawotho frişe dbritho mqabıl d’İsroyel wa cuqobe dıksaymo cala mdinoye.

Camathe’ste u mathlono dilonoyo d’Amerika Steve Witkoff athmıl maglele, di şultonutho cal qariwo gıdmqadmo renyo hatho leşan şalyuthzayno beyn İsroyel u Hamas. Me gabo hreno bu zabno d’İsroyel maqbela u bnoyo dbote b’22 dukotho b’Dıffa i Macırboyto u rişwazire’ste Netanyahu mawdacle dqtilın 18 bu yarhano u ahuno d’Yahya Sınwar-Mohammed Sınwar.

Mohammed mıdwole i mşalutho d’Hamas bıthır mıd qtılwo u ahuno-Yahya Sınwar meqım şato. U mşalo catiqo d’Hamas Yahya Sınwar thımwo bi mtaksutho da hçome dsimiwo cal İsroyel ba 2023. Cala hçomani d’Hamas, dqtılwo 1.200 bnaynoşo u dhtıfwo 251 hrene, mabdewole u gayso İsarloyo a cuqobani cal Ğaza dıkmdawmi hol adyawma.