Pentagon frısle taşroro cala grube marhıbone dıkmısnodi me Turkiya

I Sictho gawonoyto da buhone d’Pentagon d’Amerika mawdacla, Woşington kiba dmahto tedbire cala marhıbone bnayqyomo d’Turkiya dıkdayşi a zedqe noşoye b’Suriya.

 Bu taşroro dıfrısla i Sictho gawonoyto da buhone d’Pentagon mırla; İ wazirutho di baroyutho d’Amerika matila ğalabe tebe cala hawbani dıksaymi a ğrobani dıkmısnodi me Turkiya, elo naqla hreto lo mahıtla tedbire aclaye walaw kıtla zedqo dmahto tedbire aclaye.

İ Sictho da buhone di wazirutho du sutoro d’Amerika frısla taşroro cali netije da buhone dsımla cala marhıbone dıkmısnodi me Turkiya bı dukotho frişe d’Suriya u mırla; Pentagon walaw kıtla zedqo dmahto tedbire cala ğrobani d’Turkiya dıksaymi hawbe bı dukotho frişe du garbyo d’Suriya, naqla hreto lo mahıtla tedbire aclaye.

U taşrorano di Sictho gawonoyto mtayıb me 1 Nison da 2020 uhol 30 bu yarho d’Hziron dı şafıcina ucali netijathe dnafiqoste, Pentagon mawdacla u ğamo dıktucno cala hawbani dıksaymi a bnayqyomo d’Turkiya; beynothaye hawbe du msoko, qatle, kboşo d’arcotho u mal ubı idactho kıqutci a maye cala mdinoye ucalan arcothathe.

Bu taşrorano mawdıc, d’Turkiya kbışwola Tel Abyad u Rişcayno bu yarho d’Teşrin u qamoyo da 2019 bıthır ma cuqobe dsımwola cala Haylawotho d’Suriya Demoqratoyto ubu yarho d’Odor da 2018 kbışwolın a marhıbone du gasyo Athronoyo d’Suriya dıkmısnıd me Turkiya i mditho d’Afrin u dışwolın a zedqe noşoye. B’Afrinste mahrıw dukotho di slutho, htif farsufe mqabıl d’zuze u mahrıwi dukotho du arkeologi.

I wazirutho di baroyutho kınuqlo a şwolani l’Turkiya bnişo dmisım buhone şarye, elo naqla hreto heş lo hze dsim şuhlofo bi sbuthathe wa ğrobani d’Turkiya kımdawmi dkıbşi u dsaymi hawbe. Mawdıcste d’Turkiya, hawyo darbo du mazlo u mathyo da marhıbone d’Dacış bu Madınho Mescoyo, elo i wazirutho di baroyutho kımahwe heş lo kubco dmahrıwo a esorayda cam Turkiya dkıtyo bnayqyomo du NATO.

Bi sbuthatheste i mşalonitho du Komisyon Amerikoyo dcali Hirutho Emwothoyto da Tawdiyotho Nadine Maenza, ğalabe naqlat grışla u zuhoro cala hawbe noşoye dıksaymi ağrobani cala qalilotho tawdithoye du garbyo d’Suriya u makadwola cali ulsoyutho d’Amerika dmahto tedbire cala ğrobani d’Turkiya.