Qasad u Darimsuq matın l’qyomo leşan da tre mawtbe di şawtho di Aşrafiye ud’Alşex Maqsud bi mditho d’Hlob

HLOB, Suriya – Lfuth u qyomo dımde bayn dı Darımsuq uda mawtbe di şawtho di Aşrafiye ud’Alşex Maqsud b’Hlob, gıdmınfıq moro b’şıkıl kulonoyo la diloyotho da tarte şawthawotho, baynothaye i mşaynutho, i mdabronutho, i mşablonutho kenşoyto, i mardutho wa fulhone siyasi dkıtlın a’tarte şawthawothani, wu medano gıdmisım bi sdirutho da şutose di mşablonutho udi mşaynutho d’Suriya dkıtne bi mditho d’Hlob. 

U mşawrono di mdabronutho yothoyto du garbiyo udu madınho d’Suriya Badran Jiya Kurd, bi maqırhonutho dıfrısle bi dafayde d’X, mawdacle lfuth du qyomo dımde, a’haylawotho di mşaynutho gawoyto wa nuqazyothaththe gıdfayşi xıd dkıtne ba tarte şawthawotho, u gıdfılhi lfuth tahrazto mbayanto cami wazirutho di gawoyutho d’Suriya, ubebzabno gıdmitaqwe u dawro da haylawotho di mşaynutho gawoyto bu sutoro da comure da tarte şawthawotho dlo mudaxala mayna grub zaynoyo dhowe. 

Kurd mawdacle ste da tre gabe matın l’awyutho dımşahılfi yasire camıhdode, udfoyış u sistem du yulfono xıd dkıtyo hul dmimıd fusqono kamilo mi mdabronutho yothoyto. Bebzabno, Kurd mzaharle di şultonutho d’Suriya dkıtyo b’Hlob hiyayo dgıdhuyo mşalonitho cala tehdide dkibe dhowın bhaq da tarte şawthawotho. 

M’gabo hreno, i mşatasto da zedqe noşoye d’Suriya mawdacla di mdabronutho hathto d’Suriya wa haylawotho d’Suriya demoqratoyto d’QASAD matın l’qyomo bu prensib dıkmişakıl mı menyono d’nuqze, baynothaye dmitasri a’haylawotho di mşaynutho gawoyto di mdabronutho yothoyto dkıtne bi şawtho di Aşrafiye ud’Alşex Maqsud b’Hlob cama haylawotho di mşaynutho gawonoyto di şultonutho d’Suriya, elo b’şart dfayşi a’haylawotho da n’Asayış ba dukothaththe ba tarte şawthawotho. 

I mşatasto da zedqe noşoye d’Suriya mawdacla ste lfuth u qyomano, i şultonutho d’Suriya gıdmarfiyo 170 yasire ma haylawotho d’QASAD u gıdmasılmo menyono ma şlade da sohde, ubebzabno a’haylawotho d’QASAD gıdmarfın 400 yasire, ugıdmasılmi ste a’şlade da grube mzayne.