Qoyume Çelik u Paylan mşayace rmoyto leşan d’misım fulhono dlımeythi a leşone bgawıd dı Turkiya

Armoyotho dımqadmi adşato lu parlamento u la wazire d’Turkiya  bi sbutho du leşono emhoyo grışlın u zuhoro du tboco froso.

 İ rmoyto dımqadmowole u qoyumo du cameydan lu parlemento lı macıbrole lu sistem med dkıtwa bu Suryoyo, u me gabo hreno u qoyuımo Garo Paylan mqadamle rmoyto dhowe qonuno dkımdafıc a leşone emhoye dkıtne bu qento di mlaytyonutho b’Turkiya.

 U qoyumo du cameydan bu parlamento d’Turkiya mu gabo d’HDP Tuma Çelik mqadamwole rmoyto bu leşono Suryoyo bu yawmo tibeloyo du leşono emhoyo, lu waziro di mardutho udu turizm d’Turkiya Mehmet Nuri Ersoy leşan dsoyım fulhone dlo moyıth u leşono Suryoyo. İ rmoytathe u parlemento lo mafitole lu sistem du cwodo-metul dkıtwa bu leşono Suryoyo.

Bu şıkılano naqla hreto mahwela i hzayto dkıtla Turkiya mqabıl da qalilotho u dilonoyith-du leşono Suryoyo mıqa tuhmonoyto’yo. Elo bi sbuthathe dakbar ha kımşayıl a hayle dbeyn du cameydan dıksundi a siyasat di şultonutho d’Erdoğan mın kmıftakri. Lfuth i mawdconutho dmıdlan me Turkiya, a rmoyotho dımqadmi ba leşone hrene’ste lo mahti bu system du cwodo.

Me gabo hreno u qoyumo Armınoyo bu gabo d’HDP Garo Paylan mqadamwole rmoyto lu parlamento d’Turkiya, leşan dmisım şuhlofo du qonuno dıkmoyıd a leşone dkito qento dmilayti-en dlo misım fulhono aclaye. Paylan bi rmoytayde komır; lfuth u tukoso d’UNESCO, kito 15 leşone dkıtne b’qento du qşoco wu 3 leşone mlayti’ste b’Turkiya.

Beyn da 15 leşone kito u leşono Suryoyo du cameydan, u leşono zazazoyo pontusoyo, u leşone hrene. Mawxa u qoyumo Paylan bi rmoytayde ktolıb mu parlamento Turkoyo dmoyıd fusqono, leşan qonuno dmitahıt bu nomuso esonoyo dımhame a leşonani dlo maythi. Bu qonunano, dmisım fulhone leşan dmişawşıti a leşonani dkıtne bu qento du qşoco wa leşone hrene dmitaqıbli xıd leşone du athro.