Qoyume Iraqoye mabdelın kampanya mqabıl dunqolo da marhıbone lu athro du Iraq

A qoyume Iraqoye, rfıdlın dmınqoli a yaqrotho da marhıbone bnaymothoye mi maşritho d’al Hol d’Suriya, lu athro. Calathe mabde kampanya da imdat beyn da qoyume du Iraq mqabıl du tedciro da yaqrotho da marhıbone.

 12 bu yarhano mawdacwo, di şultonutho d’Boğdod kıtla tahrazto dnuqlo hol 15 alfo ma yaqrotho da marhıbone l’maşritho qaruwto l’Şigor bu qlimo d’Ninve.

A qoyume du parlamento du Iraq mawdaclın u hfuxyathe mqabıl du nqolo da yaqrotho da marhıbone dkıtne Iraqoye mi maşritho d’al Hol du garbyo d’Suriya lu athro du Iraq u m’akadle, dıkrufdi u dlıkmaqbıli i tahraztathe di şultonutho d’Boğdod.

Ha ma qoyume Iraqoye maglele’ste bi maqırhonutho dhuwle li dafo Rusoyto d’Sputnik, dımabdelın ucdo kampanya du teltimo da imdat bnişo dmaklın u nqolo da neşe uda yaqrotho da marhıbone Iraqoye mi maşritho d’al Hol lu qlimo d’Ninve.

U hfuxyano da qoyume Iraqoye athi lu hwoyo, bu zabno di şultonutho bnela maşritho dilonoyto la yaqrotho da marhıbone dkıtne ucdo bi maşritho d’al Hol d’Suriya, qariwo li fnitho da Ezidoye-Şigor. A mşale da Ezidoye’ste mahwelın hfuxyo u mawdaclın dkıtte zuctho dmisım şuhlofo demografoyo bi fnihaththe d’Şigor.

12 bu yarhano frıswo tebo bi dafo d’PUK media mawdacwo, me beyn 30 alfo marhıbone d’Dacış cama yaqrothaththe, hol 15 alfo menaye xıd grub qadmoyo, nqili l’maşritho dkıtyo qarıwto l’Şigor bu garbiyo du Iraq-dmıdwo nişo lu qtolghenso dsımwolın a marhıbone cala comurayda ba 2014. Bebzabno a dukotho du camaydan di daşto d’Ninve’ste dkıtne bu qlimano, dmidiwo nişo lu qtolğensano da ğrobe marhıbone d’Dacış dabici dı quşcile ma şerşayde.