18/02/2020

Maqım hayklo d’Mşiho bu turo d’Şarobin b’Suriya

Cal rişıd du turo d’Şarobim bi mditho d’Saydnaya b’Suriya, mahıt haykılo du bronz d’Yeşuc Mşiho dıksohıd di Mşihoyutho dgımdawmo bu athrano dımfarfasle u qrobo.

 U haykılano d’Yeşuc Mşiho kmıhşu u haykılo trayono rabo dkulle bı britho.

 Bu nişo “athino laşan dmaxlasno i noşutho”, i şultonutho d’Suriya maqımla haykılo du bronz d’Yeşuc Mşiho cal rişıd ha ma turone d’Suriya dıkmidıc bu ışmo u turo d’Şarobim dıknofıl bi mditho d’Saydnaya hedor di erişkoyto dı Darımsuq.

U haykılano dı Mşiho kibe dmıhze ma n’athrawotho d’Lebnon, d’Yurdnon udı’İsroyel, ham cal dkıtyo rabo u hamıste cal dmahıt cal turo dıkmote u cılyayde l’zıd m’2000 mıtrowiye.

U haykılano d’Yeşuc Mşiho syomo rabo di amnoruthoyo, ukmişakıl m’tlotho falqe d’haykıle, ha d’Mşiho wa tre hrene da tre abohe qamoye d’Odım u Hawwa. Lfuth i sfreyawmo Armınoyto d’Arafut, falqe mu haykılo d’Mşiho snici u nqişi bu athro d’Armenya.

U haykılo d’Yeşuc Mşiho dkıtyo cal rişıd du turo d’Şarobim, kmıhşu u haykılo rabo dkulle dı Mşiho bu qlimo du madınho mescoyo, wu haykılo trayono rabo dkulle bı britho bıthır mu haykılo d’Mşiho dkıtyo bi mditho d’Riyodijaniro bu athro du Barazil’yo.

İ dayro d’Şarobim hdo ma dayre catiqe u makthabzabnoye b’Suriya yo. U cılyayda tre kilomotre yo m’sapthıd du yamo, u Şarobim meltho Suryoyto Orumoytoyo u sukolayda Malaxe yo.

Check Also

Fatıryarxo Yunan sımle socurutho li mditho d’Alqaryatayn

İ qadişutho du fatıryarxo di cito Suryoyto Qatholiqoyto Mor İğnatiyos Yusıf Tlithoyo Yunan…