Qoyumo hreno d’Australia mdele u snodo di mawdyonutho du Sayfo

Qoyumo hreno d’Australia mdele i maqırhonutho du snodo di mawdyonutho bu qtolğenso dsim calu camaydan, calan Armınoye ucala Yawnoye ban 1915 mi mamlaxtho da Cothmanoye.

 Bi maqırhonutho du snodano dımdele u qoyumo Tony Zappia, kmıtlıb di şultonutho federaloyto d’Australia dmıctarfo ba qtolğense dsim cala 3 came Mşihoye.

Bu yarho d’Şbot dı şafıcina, mşakalwo İnisyatif mşawtıfo di Kinutho bu parlamento d’Australia leşan u mdoyo d’maqırhonutho dımtaybowa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

Calathe ucdo, u hadomo federaloyo di marcitho d’Makin d’Australia Tony Zappia, mdele i maqırhonuthathe u makadle u snodayde leşan i şultonutho federaloyto du athro, dmawdiyo bu qtolğenso dsim calu camaydan, calan Armınoye ucala Yawnoye bi şato dan 1915.

Tony Zappia dkıtyo mu şerşoyo me İtalya u dkimathıl u tayemno du athro heş me meqımste sanodo li mawdyonutho bu qtolğensoyo. Bi maqırhonutho dhuwle u senator mırle; İ mawdyonutho ba hawbani, funoyoyo la sohude ula yaqrotho da dıbhe du qtolğensano. Bebzabno, egarthoyo libritho dlıkmitaqbıl hawxa barbroyutho wa hayobe klozım dmihaşwi ba hawbani dsımlın cala 3 camani a Mşihoye.

U Komisyon dan Armınoye b’Australia mqadamle a tahınyothayde lu senator. U inisyativano mıdhe holucdo ebe me 13 senatore u qoyume frişe du athro, dıksundi i mawdyonutho bu Sayfo. 25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthıbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cothmanoye calu camaydan, calan Armınoye u Yawnoye bu zabno du qrobo qamoyo dıbritho.