Qoyumo Manfred Weber mawdacle dmifıt li harake mqabıl da camle d’Turkiya

U qoyumo Almanoyo dkıtyo u rişono du gurub camoyo bu parlemento d’Urifi Manfred Weber bu mamlo dsımle bu parlemento mırle klozım faytina li harake mqabıl d’Turkiya calu mede dıksaymo bu yamo mıscoyo bi sbutho du nafto.

Bu mamlo dsımle qrele lu huyodo d’Urifi dmitahıt tadbire cal Turkiya laşan dımakılyo u zawco dkıtla mqabıl du Yawnan.

Bu zabno haroyo amşale Almanoye mazıdlın ahfuxye dkıtlın mqabıl d’Turkiya.

Bu mamlo dsımle u qoyumo du huyodo d’Urifi Manfred Weber  dkıtyo u rişono du gurub rabo du huyodo d’Urifi EPP mırle, bi sbutho du yamo d’Ege Turkiya mşalonitho calu mede bişo dhowe. Bi sbutho di mwatyutho dkito bayn Turkiya lu Yawnan, Turkiya klozım dıdco u Yawnan bu huyodo d’Urifiyo mawxa kowe u qatrano bayn Turkiya u lu Yawnan.

Bebzabno bu mamlo dsımle bu parlemento d’Urifi mırle lıkmaqıblina dmisım hjomo lo calu Yawnan u lo cal Qufrus.

Weber bu mamleyde mırle Turkiya laşan dıfıhmo u medano klozım mahtina tadbire acla dılo lıkfıhmo mın kımina.

Ba yawmotho dı şaficina u rişqutno d’Fransaste bu mamlo dsımwole camu rişono d’Qufrus  Nicos Anastasiades b’Fransa mırwole lıkmaqıblina d’Turkiya saymo hjomo cal Qufrus u calu Yawnan, be bzabno mawdacwole dı laybe athro doyış i morutho d’Qufrıs du Yawnan dkıtna athrawotho d’urifi, wu athro dsoyım u medano gıd mi jaze.