Qoyumo Tuma Çelik U Ewgil Turker hadiri i kongre du gabo d’HDP

U gabo demoqratoyo da came HDP sımle u lumodeyde u rbicoyo bi erışkoyto d’Turkiya b’Ankara bi mtaybonutho ba alfowat da hadome u sanode dı latimowo me dukotho mşahılfe.

 Bu lumodano ba ğuboye dhawın mnaqın a rişone zawgoye dhawın Pervin Buldan naqla hreto u Mithat Sancar.

 U gabo d’HDP dkıtyo gabo dıkmişakıl me mathlone ma came dkıtne b’Turkiya sımle u lumodayde da 4 bi Arena d’Ankara b’Turkiya. U lumodano du gabo d’HDP dsim bu ışmo; i wolitho msarhabto u ittifaq demoqratoyo, mıştawtaflele mathlone ma came mşahılfe du athro. Cal ışme du camo Suryoyo-Othuroyo kıtwo u rişono du Federasyon da Hudre Suryoye Ewgil Turker wu qoyumo Tuma Çelik.

Bu lumodano dmid fusqono dminaqe 100 farsufe li mdabronutho du gabo, u mnaqınste 50 farsufe mcadrone la farsufe dımnaqın lu mawtbo. Bu salon du lumodo dımcalaqwo luhe dkıtwo kthawyotho ba leşone da came-xıd Suryoyo Kurdoyo, Araboyo mnaqın a tre rişone zawgoye dkıtne Pervin Buldan u Mithat Sancar dkıtyo mu Sawro bu şerşo.

Bu lumodano u gabo kıtwole 1018 delegat dkıtwın hadire. Bu lumodano hın ma gabe du athroste mşadarwolın mathlone lu lumodano du gabo demoqratoyo da came HDP, mathlo mu gabo di CHP mu gabo Dactid mu gabo Semoloyo u gabe hrene.

U mede dıgrışle u zuhoro inaqla dıqrın a mesaje da tre rişone zawge dmeqım dkıtne bu hbuşyo Selahattin Demirtaş u Figen Yuksekdag u camo mahwele fsihutho rabtho ba zacqat ubu helholo da neşe.