Qoyumto Codişo mawdacla mefothıd da hçome d’Turkiya maxlın 15 qıryawotho du camaydan

Ahçome dıksoyım u gayso kaboşo d’Turkiya calu garbiyo du Iraq, kımdawmi dobın husrono maddi u macnawi lu camaydan dıkhoye ba qıryawothayde dkıtne qariwe la thume d’Turkiya.

Bi netiçe da hçomani, 15 qıryawotho me du camaydan dkıtne b’Barwari Bala, maxlın ucdo kulonoyith bi netiçe da taxtuşe dkowın beyn d’Turkiya udu gerilla di PKK.

 Bu qrobo mqabıl di PKK, u gayso kaboşo d’Turkiya kımdawım b’şıkıl barbroyo dhoçım cala fenyotho mşahılfotho du garbiyo du Iraq dkıtne qariwe la thume d’Turkiya, beynothaye a fenyotho u qıryawotho du camaydan u Kaldoyo Suryoyo Othuroyo. Ubi netiçe da hçomani, a comure da qıryawotho du camaydan dımşatsiwo ba 2007 çbiri ucdo dımgalwın l’dukotho hrene du garbiyo du Iraq, bıthır mıd a hçomani huwlın husrone rabe lu momuno uli ciyeşe du camaydan dıkhoye qariwo la thume d’Turkiya.

Klara Codişo dkıtyo qoyumto mu camaydan bu parlamento du qlimo d’Kurdistan, bi maqırhonutho dhula li dafo d’Bas News mırla; A qıryawotho du camaydan dımacmıriwo meqım 14 ışne mi şultonutho du qlimo, u dıkhoye’wo ebaye u camaydan b’şlomo ubı mşaynutho, ucdo maxlın kulonoyith ma comurathe, mcal fothe da hçome folhoye d’Turkiya ucal dkito ebaye gerilla di PKK. A 15 qıryawothani dmaxlın bi fnitho d’Barwari Bala’ne dıknuflo beyn d’Zaxo u Nuhadra.

Qoyumto Codişo mawdacla’ste d’Turkiya ba kmo yawme haroyani sımwola hçomo cal cito dhdo ma qıryawotho du camaydan cal dkıtwo eba gerilla di PKK, ubi netiçe du hçomano hiw husrono momunoyo li cito, la bote, la haqle ula qatce da cwone, wu camaydan’ste çbir dımgalwe u dıtore a botayde. Lfuth i maqırhonutho dhula i qoyumto, a hçome Turkoye wa taxtuşe dkowın PKK, hulın husrono rabo lu momuno uli ciyeşe du camaydan d’Barwari Bala, dilonoyith da comure di fnithathe kmaydi i zarocutho wi tarbitho da qatce xıd asas di ciyeşathe.