Qtil zıttır me 20 folhe Turkoye ba hjomani dıksaymo bu garbyo du Iraq

Hani zabno dıkmo yawmotho, mabdela Turkiya qrobo du kboşo bu garbyo du Iraq bışme dıksaymo hjomo cala haylawotho du ağuno di hirutho da Kurdoye PKK wa hayle hrene. 

 Lfuth i mawdconutho dıfriso bu froshezwo d’Alhadath u Hawar News, qtil zıttır me 20 folhe Turkoye ba hjomani dıksaymo bu garbyo du Iraq.

 Bu zabno haroyano dıkmiharhızo Turkiya bıgawe d’ruha mcal fothe di aykanoyutho du momuno uda gabe saqıbloye dıkmahwın qawye, i şultonutho dkıtyo bi rişonutho du gabo d’AKP kımuhyo rişo ba dukothe du qrobo bıthır me Suriya, Libya ucdoste manhatla hayle lu garbyo du Iraq.

Bahjome dıksaymo Turkiya mi hawa cala fenyotho d‘Haftani wa turone d’Qandil i şultonutho du qlimo d’Kurdistan mawdacla dıqtil 5 farsufe mdinoye. Me gabo hreno bi mawdconutho dıfrısle u gerilla di PKK mawdacle, dmadrelın 2 helikoptere u qtil hol 20 folhe Turkoye. Bi mawdconutho dhule ha ma froshezwo mawdacle d’47 folhe qtili ban arcotho du Iraq.

Bi sbuthathe u mede dıkgorış u zuhoro ba maqırhonwotho dkobın a rişone Turkoye kımmi; Mabdelan a cuqobani cali PKK u ğer hayle hreneyo. İ şultonutho du qlimo d’Kurdistan huwla maqırhonutho u tlıbla me Turkiya dmakılyo ahjomeydan calan arcothotho du qlimo, metul da mdinoye kımvayci a hayathe, ume gabo hreno sımla qrayto li PKK’ste dnufqo ma thumayda.