U rişono d’Amerika Donald Trump, mawraxle i aykanoyutho şnızto d’Suriya l’şato hreto

WASHINGTON – U rişono Amerikoyo Donald Trump athmıl mawdacle, dmawraxle i aykanoyutho şnızto cal Suriya şato hreto cal dheş i şultonutho d’Darımsuq kımşaklo qento. Bi mawdconutho dhuwle Trump li kongre m’akadle, di aykanoyutho şnızto dmahtowa cal Suriya ba 2004 mu rişono catiqo George W. Bush, gıdmdawmo me ramhıl wazolo.

Bi mawdconuthathe Trump m’akadle, di şultonutho d’Darımsuq kito heş dhıcfiye rabtho bi mdabronuthayda-lo qadiro dmafito a zayne kimyawi du athro lu duyoqayda, layto ağono mawthrono mqabıl da tukose marhıbone dıkmdawmi dımşakli gzomo qaşyo li mşaynutho athronoyto, li siyase di baroyutho uli rehımto momunoyto d’Amerika b’Suriya.

Bebzabno u Qusro Heworo’ste mawdacle du fusqonano dcali aykanoyutho şnızto d’Suriya gıdmdawım, hol dmıhze en sim şuhlofe bi siyase di gawoyutho udi baroyutho d’Suriya bu dactith. Amerika walaw latla ucdo mathlonutho diplomatiqoyto ruşmoyto b’Suriya, mahıtla’ste ma 2011 şişaltho d’tedbire cal şutose u farsufe u mşale du rejim.

Calu fusqonano d’Amerika, i şultonutho d’Darımsuq heş lo mfanela ubu dacbar’ste kull naqla rıfdowa i şultonutho i klaytathe d’Woşington u mawdıcwo’wa-du fusqonano latho qonunoyo elo folitiqoyo’yo.