RİŞQUTNO CIRAQ LQOYTO BAR’AMNO D’ARMENİA

U rişqutno du Ciraq bi socurutho dsımle athmıl l’Armenya, laqi u rişqutno d’Armenya Vahakın Xatşatoryan. Bi ytawtathe, drişi an esore beyn da 2 athrawotho u aydarbo kibe dmitaqwın zıttır wa şuşote dkowın bu haqlo Emwothoyo. Raşid bu mamlayde makadle da Armınoye dıkhoyın bu Ciraq falqo ulsoyone mu athro ukımathli u geşro dıkmaqwe a esore dbeynothaye.

U rişqutno Cıraqoyo mırle; İ şkihutho da Armınoye bu Ciraq kdıcro la dore da Bıbloye, u mıştacelın dawro bu bnoyo du Ciraq u mqadamlın dıbhe. A Ciraqoye kruğşi ba teşniqe du qtolğenso dsim cala Armınoye bi şato dan 1915, cal du Ciraq şafıc bcayni casqutho, u laqi bu zabno di diktatoriye ba qtolcame d’Halabça ud’Anfal ubi haraytathe a gunhe marıhbone d’Dacış.

Me gabo hreno, u rişqutno Armınoyo grışle u zuhoro cal tathir msimono dtrela i socurutho du rişqutno du Ciraq cala esore beyn da 2 athrawotho cal dkıtyo i socurutho qamayto dıkmisomo me rişqutno Ciraqoyo l’Armenya. Xatşatoryan bu mamlayde mqalasle u dawro rişoyo dıkmıştace u Ciraq bu haqlo du teqwiyo di şaryutho bu Madınho Mescoyo, ubu snodo da şroye mşayne da krize dkito bbritho.

Camgabıdathe, a 2 bnayamne mrayşanlın knuşyo dmıştawtaflele 2 taşdaryotho ruşmoye mu Ciraq ume Armenya, u drışlın menyono d’qyome u fhome b’haqle mşahılfe. Bu knuşyano u rwiho driş’ste menyono d’sebwotho mşawtıfe; beynothaye dmitaksi a fyore beyn d’Boğdod u Yerivan u beyn d’Arbil u Yerivan, bnişo dzoyıd u menyono da socure, u kle’ste calu qyomo dmitaqimo i viza, u dmıftıh xtuto du fyoro baroyo beyn da tre athrawotho, bnişo dmitaqwın a esore di hawrutho beyn du camo Armınoyo wu camo Ciraqoyo.