Ulf Kristersson u Jens Stoltenberg
02/02/2023

Rişwazire du Swed Kristersson midle klayto mqabel Erdoğan calu şart hreno dmhatele qum du Swed udu cborayde lu NATO

‘Ahna layban dmıncina u tewqido du qurcan’ a melani du funoyo dhuwle u rişwazire du Swed Ulf Kristersson lu mamlo hatho dsımle athmıl u rişqutno Turkoyo Reçep Tayyıb Erdoğan. Erdoğan mzaharle u mırle; Turkiya lıgmacbıro u Swed lu NATO, hol di şultonutho kobo aftho lu tewqido du qurcan. Me gabo hreno lfuth istatıstik dsim b'Finland, i sagiyoyutho du camo hadiroyo dcobır lu NATO dlo mu Swed’ste.

02/02/2023

STOKHOLM / ANKARA –Athmıl sımwole u rişqutno Turkoyo Erdoğan mamlo bu parlamento du athro u mahıtwole şart hreno qum du Swed udu cborayde lu NATO. Bu mamlayde Erdoğan mırle; U kthowaydi u mqadşo-u qurcan mawqıd u mahrıw. Hol dkobitu aftho lu medano, ahna lo kımmina E lu cborathxu lu NATO.

Calu mamlano’ste u rişwazire du Swed Ulf Kristersson mfanele u mırle; Layban dmaklena u tewqido du qurcan wu şartano dmahıt, lıkm’athır calu cboro du Swed lu NATO. U şart dmahıt, latle asirutho bi hirutho du maftahfemo udi hirutho tawdithoyto. Kıfohamno u ruğzo d’Turkiya elo onoste qanico’no, du qyomaydan heş kımhalıx uholucdo, lathilan xabro dmakle u maşıqlo.

Bebzabno bu athro şbobo Finland dkıtyo huwe’ste bu maşqılano du cboro lu NATO, mnicoyo u tewqido du qurcan elo camathe’ste, sim istatıstik beyn du camo- en hadiroyo dcobır lu NATO dlo mu Swed, 53 ba mo dımşayıl menaye mawdace, du cboro d’Finland-lıklozım dhowe masro bu Swed-u şwolo du Swed, latyo didan.

Cala hfuxye dmahwe b’Turkiya mqabıl di sbuthathe du qurcan, sxir mınyono d’mathlonwotho nuxroye. Bıthır mi rişizgadutho d’Amerika, Almanya, Hollanda u Britania, ucdo’ste sxırla Fransa a izgadwothayda dkıtne b’Turkiya hol zabno lo idico mi celtho du qento di mşaynutho. Elo Rusya, heş lo sxırla i izgaduthayda b’Stanbul.