Rusya gıdmşatso 20 ğrobe folhoye leşan dqudri dkolın mqabıl da hayle du NATO

Rusya gıdmşatso 20 ğrobe folhoye hrene bu macırbo du athro, leşan dqudri dkolın mqabıl da hayle du NATO.

U waziro du sutoro d’Rusya Segej Şoigu, bi maqırhonutho dhuwle la mşale folhoye m’akadle u tebano u mawdacle, dıklozım dmaşqın u duyoqo da thumathe mqabıl di ithutho dkıtla Amerika qariwo lu macırbo d’Rusya.

Bi ytawto dhawile athmıl u waziro du sutoro d’Rusya Sergej Şoigu ma mşale frişe du gayso mawdacle, dgımşatsi holi harayto d’adşato 20 ğrobe folhoye hrene bıgawe du gayso leşan u duyoqo da thumathe mqabıl da gzome dzayidi mqabıl dıthe ma hayle du NATO.

Bu mamlayde Şoigu mawdacle’ste, du mınyono du fyoro da tayosyotho rabe d’Amerika zayidi cala thume d’Rusya wu NATO’ste kıtle mınyono celoyo d’sfinotho du qrobo u kısoyım şişaltho d’droşe folhoye bu qlimo. Lfuth u waziro Rusoyo, u nişo di ithutho folhoyto du NATO, u tehriwo du sistem di mşaynutho’yo

Lu duyoqo da thumani du macırbo d’Rusya, mbayın hol 2 alfo zayne frişe. Cali sbuthathe u notarozo gawonoyo du NATO Jens Stoltenberg mırle; Rusya mahıtla ışqad yuqro rabo la mkone ulu şuşoto du gaysayda, kıtla sisteme d’zayne nukleer u hadırto’yo dmıstacmılolın mqabıl dan athrawotho şbobe-Georgia u Ukraina.

Stoltenberg mırle; Hathe’yo i celtho rişoyto du NATO bıdele ışqad dımhaydır ruhe wa hayle folhoyayde. U NATO adyawma mhaydarle ban alfayo dfolhe, sfinotho uba casrowat d’tayosyotho du qrobo la droşe folhoye dıkmisomi b’dukotho frişe du Oqyanus d’Atlantik, b’Urifi ubu yamo Komo. Wu nişo da droşani’ste, latyo Rusya elo u teqwiyo di methcadronutho da hayle frişe du NATO’yo.