Rusya maklela a dawriyat cam Turkiya b’İdlıb

U maşıqlo folhoyo u folitiqoyo bu macırbo d’Suriya, kul dkothe khorıw u kqoşe. Cala şuşote haroye dhawın bu qlimo d’İdlıbste, maklela ucdo Rusya a dawriyat dıksaymo cama hayle Turkoye b’İdlıb.

 Hıdo ma sebwotho rişoye du tekliyo da dawriyat d’Rusya cama Turkoye b’Suriya, u qedomo d’Ankara la İmarat Caraboye Mhayde, bıthır mu qyomo dımdele u athro cam İsroyelyo.

A şuşote dkowın b’İdlıb kull dkothe kqoşın, bu zabno d’Rusya kmawdıco dmaklela adawriyat mşawtıfe dıksaymo cama hayle Turkoye bu qlimo, bıthır mıd dzayidi a hjome bu qlimo. Bebzabno mahıtla Amerika u Fransa klayto bi sbutho du şekolo di şultonutho hathto d’Lebnon wu Turkiyaste, latyo thınihoyto calu qyomo dhawi beyn da İmarat Caraboye Mhayde udu athro d’İsroyel dkıtle esore diplomatiqoye cam Ankara.

Dafe frişe da Caraboye mawdaclın, di wazirutho di baroyutho d’Rusya wu athro d’Turkiya maklelın ucdo a cuqobe mşawtıfe dıksaymi hedor u darbo Emwothoyo d’M4 dkıtyo qariwo l’İdlıb mcal fothe da hjome zayidi aclaye ma ğrobe saqıbloye du qlimo. A dawriyat d’Rusya u d’Turkiya mşarewolın bu yarho d’Odor dı şafıcina bıthır mu qyomo di şalyuthzayno dhawiwo beynothaye.

I malılto di wazirutho di baroyutho d’Rusya Maria Zakharova mırla; Ahjome haroye dsimi ma ğrobe qaşye, hawyo celtho dmitaklın a cuqobani da hayle Rusoye cam Turkiya. A marhıbonani mazıdlın a furqoce wa hjome dcala hayle bnayqyomo di şultonutho du rejim u kımdawmi a provokasyonathe calu darbo d’M4.

Bebzabno i sfaryawmo d’al Carab mawdacla, du kenşo Emwothoyo mhanele u qyomano dhawi beyn İsroyel wa İmarat Caraboye Mhayde, cal dkımhadıd a fulhone d’Turkiya udu İran bu qlimo. Calu qyomanoste, gzımla Turkiya dı qutco a esorayda cama İmarat Caraboye elo kubco dımdawmo a esorayda a diplomatiqoye cam İsroyel bu haqlo du endustri u di folhutho. Bu zabno du İran kımfaşıq İsroyel qento rabo lu Madınho Mescoyo, a İmarat, i Scudiye u İsroyel kımmi u İran’yo u qento rabo du qlimano.