04/08/2020

Rusya sımla cuqobe casye cal gurube marhıbone bi Latqiye

A tayosyotho du qrobo d’Rusya dkıtne b’Suriya, sımlın cuqobe casye cala dukotho dkıtne bu duyoqo da marhıbone bi mditho di Latqiye.

 Bu zabno da cuqobani d’Rusya, a hayle du rejim d’Suriyaste mhelın bıha ma ğrobe di saqıbloyutho d’Jabal al Akrad.

Lfuth ajanse frişe da tebe, bu zabno da tayosyotho d’Rusya sımlın athmıl casriye cuqobe oyaroye cal dukotho da turone bu macırbo di Latqiye, a hayle du rejim du rişathro Başar al Asad’ste hjımlın ba soruhe calu ğrob saqıbloyo d’Jabal al Akrad.

Mawdıcste d’nafıq taxtuşe beyn du ğrobano udu gayso du rejim wa hayle bnayqyomayde dımnaselın dımşawşıti me 2 gbine frişe da turone dkıtne stratejikoye l’Jabal al Akrad. Bi netije da taxtuşani dımdawamlın ba şoceste, mawdıc dıqtil mınyono dfolhe ma 2 gabe.

Lo Rusya u loste u rejim, m’akadlın a cuqobe wa taxtuşani dhawın bu macırbo di Latqiye dkıtlın a hayle Rusoye foqudutho oyaroyto eba. U rejim d’Suriya, sımle ğalabe naqlat cuqobe calu ğrobano, bnişo dmoyıd u duyoqo da turone d’Kubayna.

Bu tewfiqo du ğrobano d’Jabal al Akrad ma turonani, gıdqodır u rejim dımamın a dukothayde b’İdlıb, bu garbay macırbo u hedor u darbo rabo dıkmasır a mdinotho di Latqiye u Holob bıhdode. Bu qlimano du garbay macırbo d’Suriya, kito hem a marhıbone d’Dacış u hemste ğrobe frişe di saqıbloyutho uba mo alfayo d’galwoye dmahzamlın ma dukothathe mcal fothe du qrobano.

Check Also

A gabe u tukose komonist u semoloye mawdelın bu Sayfo da 1915

A gabe  u tukose  komonist baynothemwothoye frıslın maqırhonutho dıkmawdin bu sayfo du cam…