Sarkissian tlıble i isticfa di şultonutho d’Pashinyan

U rişqutno d’Armenia Armen Sarkissian, mkararle i qroyto di isticfa di şultonutho du rişwazire Nikol Pashinyan u dmitalız calu tuyobo d’guboye gawonoye hathe.

Bı maqıblonutho dsımle u froshezwo d’Armenia camu rişqutno makadle, dkito sniqutho dmisım u şuhlofano leşan dmınfıq mu kriz dkito bu athro.

U rişqutno d’Armenia Armen Sarkissian mkararle a qroyotho dsimi ba zabne haroyani mqabıl du rişwazire u di şultonutho du athro. Ba tagliyotho dsımlın a saqıbloye, tlıblın du rişwazire u di şultonuthayde dmıstacfın mi wolithathe leşan dmıftıh darbo lu tuyobo d’guboye gawonoye hathe.

Sarkissian mawdacle, di şultonutho klozım dmıstacfo bnişo dmisım guboye du parlamento bıthır mi şalyuthzayno dmarkawla Rusya 10 bu yarhano leşan dmitaklın a taxtuşe bu qlimo d’Nagorno Qarabax. Lfuth u rişqutno, kito adyawma sniqutho rabtho dmisım u şuhlofano leşan dmınfıq mu kriz camuqo dkito bu athro.

Sarkissian mırle; A guboyani klozım dmisomi ucdo. A guboye haroye simiwo meqım 2 eşne wa folitiqore ducdo qmırwolın sagiyutho bu parlamento elo Armenia adyawma latyo lfuth u mede dkıtwa meqım 2 eşne. Bu maşıqlano kıtlan sniqutho l’şultonutho zabnoyto u folitiqoyith dhuwyo neutral u dımhadro a şartat l’guboye gawonoye hathe b’Armenia.

U rişqutno inaqla qamayto dmıjğewole cala guboyani, tlıbwole dmisım guboye 16 bu yarhano mcal fothe da tagliyotho dsimiwo mqabıl di sbutho di şalyuthzayno b’Qarabax u thımwo u rişwazire Pashinyan, dhawi celtho dığlibo Armenia bu qrobano. Calathe tlıbwo mene dmıstacfe mi wollithayde, elo Pashinyan rfıdwole u talabano da mtagliyone u huwole şudoyo dsoyım şuhlofe bi şultonuthayde.