Senatore Amerikoye mkararlın dmitahıt tedbire cal Turkiya

Senatore Amerikoye, naqla hreto mkararlın dıklozım dmitahıt tedbire cal Turkiya, cal dheş kubco d’zawno u sistem da soruhe d’Rusya-S-400 .

 İ qroytathe da tıre senatore Amerikoye, mşadro lu waziro di baroyutho Mike Pompeo u tlib mene dobe fuşoqo bi sbuthathe.

U senator Qutnuthoyo James Lankford wu senator Demoqratoyo Chris Van Hollen sımlın athmıl qroyto li şultonutho du rişono Amerikoyo Donald Trump, dmahto tedbire casye cal Turkiya calu nesyonayda du zwono du sistem d’S-400 me Rusya. U sistemano d’S-400, kmitıstacmıl mqabıl da tayosyotho dıkcubri la thume oyaroye du athro.

Wi qroytathe da 2 senatore simo, bu zabno da tebe dıfrisi u dmawdıc, d’Turkiya kit cal qariwo dsaymo test du sistamano d’zwınwola me Rusya. Ba egrotho dımşadarlın a senatore lu waziro di baroyutho Mike Pompeo mşayelın mene cala tebani dıfrisi u mawdaclın, cal d’Waşington lo qadiro dobo funoyo towo l’Turkiya, huwle jasara rabtho li şultonutho d’Ankara.

Turkiya meqım şato zwınwola kmo ma sistemani d’Rusya u calathe’ste, maklewola Woşington-Turkiya mi tahrazto du snoco da tayosyotho d’F-35. Amerika mawdacwolaste dkıtne hadire dmahti tedbire cal Turkiya en dothe dmarkıwo u dmıstacmılo u sistemano d’S-400.

Elo holucdoste, lo mahıtla Amerika tedbire cal Turkiya. Yawme dı tlotho mawdacwole u froshezwo d’Bloomberg dmatiwole tebe me dukotho frişe, d’Turkiya kımhadro ruha dımjarbo u sistemano d’S-400.