Senatore hreto mdela i maqırhonutho laşan i mawdyonutho du Sayfo da 1915

Senatore hreto d’Australia mdela i maqırhonutho leşan i mawdyonutho bu qtolğenso dsim calu camaydan, calan Armınoye ucala Yawnoye ban 1915 mi mamlaxtho da Cuthmanoye.

Bi maqırhonutho du snodano di senatore Rachel Siewert, tlıbla mi şultonutho federaloyto d’Australia dımawdıyo ba qtolğense dsim cala 3 came Mşihoye.

Bu yarho d’Şbot dı şafıcina, mşakalwo İnisyatif mşawtıfo di Kinutho bu parlamento d’Australia leşan u mdoyo d’maqırhonutho dımtaybo’wa mu Komisyon Athronoyo dan Armınoye b’Australia, mu Huyodo Tibeloyo Othuroyo u fırco d’Australia wu Mawtbo da Yawnoye b’Australia, leşan u athro dmawde ba qtolğense da 3 camani.

Ucdo’ste i senatore Rachel Siewert dkıtyo me Perth, mu gabo da Yaroqe wu mşalonitho du Komisyon du şuşoto kenşoyo, mawdacla u snodayde lu inisyativano u m’akadla di şultonutho, klozım dmawdıyo bu qtolğenso dsim calu camo Suryoyo Othuroyo, calan Armınoye ucala Yawonoye bi şato dan 1915.

Rachel Siewert heş ma 2016 kısundo i mawdyonutho bu qtolğenso ubu mamlayda mırla; Lfuth i hzaytaydi, britho fayişo mşawharto bi mawdyonuthathe du hawbano dsımwo meqım 106 eşne. Athi u zabno dkull athro b’britho-u athraydan’ste acmaye, dmıctarıf bu qtolğensano u barbroyo. Athi’ste u zabno du rejim d’Erdoğan dmoyıd i mşalutho du makthabzabnathe.

U inisyativano mde holucdo ebe me mınyono celoyo d’senatore u qoyume frişe du athro, dıksundi i mawdyonutho bu Sayfo. 25 bu yarho d’Şbot, a tukose da 3 camani mtayabwolın hfitutho marduthoyto l’100 hadome du parlamento, mşale di wazirutho di baroyutho, falohe da makthbe folitiqoye, akademikoye, u falohe du tbocofroso uğer, leşan dmitalım imdat di mawdyonutho bu qtolğenso dsımwola i mamlaxtho da Cuthmanoye calu camaydan, calan Armınoye u Yawnoye bu zabno du qrobo qamoyo dbritho.