Sfito da galwoye ğayiro bu yamo d’Libya

‘Ba casrowat d’galwoye ihtimal rabo mvayaclın a hayathe bu gedşo dmafıtla i sfithathe bu yamo d’Libya’, i mawdconuthathe d’Emwotho Mhaydotho’yo.

Lfuth hın sohude d’maxlase mu mawto, kıtwo 20 neşe u tre tloye beyn da galwoye dıhniqi bu gedşano di sfito.

U malolo du Tukoso Emwothoyo da Galwoye-IOM huwle adyawma maqırhonutho cali sfito d’ğayiro qariwo lu macırbo du sforyamo di mdito d’Khums d’Libya. Bi sfitathe kıtwo 75 galwoye u lfuth u mşalo Emwothoyo, 57 menaye hniqi bu gedşano.

Lfuth hın ma 18 galwoye dmaxlase mu gedşano dkıtne me athrawotho frişe d’Afriqya, beyn da farsufe dımvayaclın a hayathe, kıtwo 20 neşe u 2 tloye. Mawdıc di sfito ğayiro mi hawxa harıwto dkıtwo bu yamo bıthır mıd nafıqla qetro du motor. Sayode da nune nqilın a farsufe d’maxlase lu sforyamo di mdito.

Bu darbano du yamo Mescoyo, hniq ğalabe galwoye. Meqım şabtho’ste mafıtla sfito hreto gedşo u hnıqwo 20 farsufe. Elo camani’ste, ba cuqobe dsımlın a hayle du yamo d’Urifi u d’Libya madcır hol 500 galwoye naqla hreto l’Libya. Mu şuroyo di şatathe uholucdo, madcır hol 15 alfo galwoye lu athro.