Sim hçomo cal qentrun da Haylawotho d’Suriya Demoqratoyto bu qlimo d’Deyr Ezzor

Ğrob d’farsufe dheş latyo i hiyoyuthathe idıcto, hçımlın cal qentrun da Haylawotho d’Suriya Demoqratoyto bu qlimo d’Deyr Ezzor.

Bebzabno mawdıc, da hayle d’QASAD msıklın marhıbono b’Deyr Ezzor dhani zabno yarixo tolewo ruhe. Bı cuqobe hrene dsimi bi mdito d’Kobani, mqafe cambar rabo da zayne da marhıbone d’Dacış.

Lfuth i Mşatasto da zedqe noşoye d’Suriya dımcaqbo u qrobo gawoyo d’Suriya me Britania, ğrob msalho dheş latyo i hiyoyuthayde idıcto, hçımle athmıl calu qentrun da hayle dilonoye d’QASAD dkıtyo bi mdito d’al Şuhayl bu qlimo d’Deyr Ezzor. Mawdıc’ste, meqım du ğrobano dmahzım mi duktho, nafıq taxtuşe beyn da hayle d’QASAD uda hadome du ğrobano.

Ba hçomani’ste noşo lo qtili ulo mçarıh elo m’akıd, d’helikopter du qrobo d’Amerika fayiro cali fnitho-bu zabno da droşe folhoye dmisomiwo beyn da hayle Amerikoye udı QASAD. Me gabo hreno, msıklın athmıl a Mharbone d’QASAD u marhıbono al Sattan b’Deyr Ezzor dhani zabno yarixo tolewo ruhe leşan dlo mımsık.

A hayle d’QASAD msıklın u marhıbono bıthır ma istixbarat dmatilın me comure. Ba kmo yawme haroyani’ste, msıklın a hayle d’QASAD mınyono d’marhıbone dıkmnasanwo dsaymi hçome b’Deyr Ezzor. Bebzabno bi mdito d’Kobani bu garbyo d’Suriya, mqafe cambar malyo zayne da marhıbone d’Dacış.

Mawdıc du şutoso dıkmahrıw a foqucotho di arco ba cuqobe dsımle bu macırbo d’Kobani, mqafele u cambarano dkıtwo bıgawe hol 51 soruhe u zayne hrene. Me gabo hreno a hayle kaboşe d’Turkiya dkıtne idice bu qedomo qaşyo dkıtte b’Suriya, qtilın iqartho Kurdoyto d’4 farsufe bi fnitho d’Cayn Cisa bu soruho dmafırla bu bayto di iqarthathe dkıtwe bi qritho d’Sefawiye. A tuhmonoye d’Turkiya, qtiwolın ba yawmotho d’şafıcina iqartho hreto Kurdoyto d’7 farsufe, bi mdito d’Konya.