Sim knuşyo mi sictho da mathlone da şutose di mcadronutho l’Turcabdin

İ sictho da mathlone da 6 şutose dımtayabwolın i tarmitho di mcadronutho da makinat du tetfiyo di nuro  la qıryawotho d’Turabdin, sımlın u knuşyathe u huwlın mawdconutho calu feroqo da makinat la qıryawotho du camaydan.

 I tarmithathe simowa b’tahrazto dıfriso b’Suroyo tv u maltamwo zuze leşan dmısnodi a qıryawotho wa dayre du camaydan b’Turabdin.

Bi egartho dımşadarla i sictho da mathlone da şutose dkıtyo b’Turabdin mawdacla, du fulhono du feroqo da makinat sim bşıkıl mtakso u dmamdelın warqe ba mathlone da qıryawotho dlayimi bu qentrun du Federasyon da Hudre Suryoye SUDEF 25 bu yarho d’Tamuz, bıthır mıd dmıdwolın a makinat du tetfiyo di nuro.

I sictho da mathlone d’Turabdin bıthır mu knuşyo dsımla 29 bu yarho d’Tamuz, mşadarlın egartho leşan dmahwın u fulhono du feroqo da makinat aydarbo mtayıb.

İ sictho camgabe dımşadarlın i egarthathe la şutose dı qayimi bi tarmithathe, mqadamlaste lohitho da makinat layna qıryawotho mfarqi camu ışmo di qritho da mathlone da qıryawotho.

Be bzabno a mathlone da şutose b’Turabdin mawdaclın da mathlone da qıryawotho camıhdode mqadamlın tawdiyotho la şutose u l’Suroyo tv dı qayimi bi tarmithathe u dilonoyith mqadamlın tahınyotho lu camo kule dımcadarle bi tarmithathe.