Sim knuşyo şnizo cali aykanoyutho du hulmono b’Lebnon

U mawtbo celoyo di mudafaca d’Lebnon, bu knuşyo şnizo dsımle adyawma, drışle i aykanoyutho du hulmono uda botaykrihe d’Lebnon, bu taro di qaşyutho du kewo du virus d’Corona.

 Lfuth i wazirutho du hulmono d’Lebnon, u menyono da farsufe dmayithi bu virus d’Corona mati l’hedor d’1600 farsufe.

 Cali qroyto dsımwole u rişqutno d’Lebnon Mişel Caun, u mawtbo celoyo di mudafaca d’Lebnon, qtırle adyawma knuşyo şnizo bu qusro dı Bcabda bi mditho d’Bayrut, udrışle i aykanoyutho du hulmono u da botaykrihe du athro bu taro du bırbozo qaşyo du virus d’Corona.

A’şutose Lebnonoye du tboco froso, mawdaclın di sictho dkımcaqbo a’tedbire mqabıl di Corona, hula fuqdono dmitahıt u athro d’Lebnon kule bu karanten l’zabno d’şabtho, awkith dmımnıc u cboro nfoqo gawonoyo udmısxır u bethtawso emwothoyo d’Bayrut l’zabno d’şawco yawme.

U mşawrono du rişqutno d’Lebnon Walid Alxuri bi maqırhonutho dhule lu tboco froso, mawdacle dıtlib mi şultonutho dmahto u athro d’Lebnon bu karanten gawonoyo, udmitahwe muhle la bnaymothoye laşan dşuqli a’sniqwothaththe.

U knuşyo dsımle adyawma u mawtbo celoyo di mudafaca d’Lebnon, athi luhwoyo bu zabno dlıfayışlın a’botaykrihe mkono dsaymi u tedawi du menyono celoyo da kayiwe dıtafilın u virus d’Corona. Lfuth i wazirutho du hulmono d’Lebnon, u menyono da farsufe dmayithi mi celtho di Corona mati l’1590 wu menyono dıtafilın u kewo mati l’215 alfo u 553 farsufe.

U rişono di tahbartho da osye d’Lebnon, tlıble dmitahwe snodo la botaykrihe di şultonutho, u mawdacle da botaykrihe dilonoye malın ba kayiwe, elo a’botaykrihe di şultonutho dmasrıf aclaye ba milayre d’lerta Lebnonoye, balhude 10 hul 15% ma kayiwe di Corona ksaymo baytoyutho. Bebzabno, u rişono di tahbartho da osye d’Lebnon sımle qroyto dhowe sdirutho kamılto bayn di wazirutho du hulmono, u slibe smoqo wa botyakrihe, bnişo dmifarqi a’kayiwe cala hiğmınwotho d’Lebnon ucala karxıwothayde.

Lfuth hın sferyawme Lebnonoye, kito botaykrihe di şultonutho cal dlıfayış kibın dsaymi baytoyutho la kayiwe, fayış ksaymi u tedawi ba parkat da radoyotho, u mawxa kito zuctho rabtho dıtofe l’Lebnon u şıkıl di Corona meqım u athro d’dımhewola İtalya.