Sim qreyto lı Armenya u l’Azarbaijan cal xayifo dyıtwi la bazare

U qlimo d’Nagorno Qarabax mawdacle da hayle oyaroye du gaysayde madrelın helikopter du gayso d’Azerbaijan ban arcotho du İran.

 Mxasra hreto, Fransa, Rusya u Amerika tlıblın baroyo dmitaklın a taxtuşe beyn Armenya u Azerbaijan bu qlimo d’Qarabax, u dyutwi atre gabe b’surhobo la bazare dcamıhdode.

 U gayso du qlimo d’Nagorno Qarabax bi maqırhonutho dhule lu ajans d’Armen Press, mawdacle dmadrele athmıl helikopter du gayso d’Azerbaijan bi fnitho d’Varazatomb, wa falqayda nafili ban arcotho du İran. U gayso d’Qarabax bu buyono difrısle mawdacle du gedşano lo bidactho sim, elo hawxa gedşe kibe dhowın, cal du qrobo dmabdela Azerbejan qariwoyo la thume du İran.

Bebzabno, i malılto di wazirto du sutoro d’Armenya Şuşan Stipanyan, bi maqırhonutho dfrısla, mawdacla du qrobo heş kımdawım beyn Qarabax u Azerbaijan, wu jğuşyoste bcayni şıkıl kımdawım ba xtute kule du qrobo. Stipanyan mawdaclaste dhın ma fenyotho kmıhjım aclaye b’zayne yaqure, wa grube du sutoro d’Qarabax mnıclın a hayle d’Azerbaijan dımqadmi lafan arcotho du qlimo, u jibrilın dımşahılfi a dukothathe.

Bu taro da hfuxye Emwothoye dkimdawmi mqabıl du qrobano, a rişone d’Fransa, d’Rusya u d’Amerika, cal dkıtne rişone zawgoye du grub d’Minsk dımşataswo ban 1992 leşan u şroyo du kriz d’Qarabax, frıslın adyawma buyono mşawtifo lu tboco froso cali sbuthathe. Bu buyonathe, Macron, Putin u Trump tlıblın me Armenya u Azerbaijan d’baroyo dmaklın u qrobo b’Qarabax, u sımlınste qroyto la 2 gabe dıducri b’surhobo la bazare bi rocyutho da rişone zawgoye du grub d’Mins dkıtyo masro bu tukoso di Mşaynutho udi Methcadronutho d’Urifi.

Me gabo hreno, u rişqutno d’Armenya Armen Sarkisyan, mzaharle u kenşo Emwothoyo mi sbutho da Qawqaze dgıdhuwyo qetro rabo lbritho u gıdmişahılfo l’Suriya hathto en dıloşofıc u kenşo Emwothoyo li harake bi sbuthathe. Sarkisyan bi maqırhonutho dhule lu froshezwo Ameriko’yo, grışle u zuhoro cal Turkiya dıkxılqo qetre b’kull duktho hedora, bu yamo Mescoyo, bu Yawnan, bu Iraq, b’Libya ub’Suriya.