Sim qroyto lu Huyodo d’Urifi dmitahıt kleyto laşan dmitakliyo Turkiya

U waziro di baroyutho d’İtalya dmeqım Franko Frattini, mawdacle dlayto rişone qawye b’gawıd du Huyodo d’Urifi, dkibın dkolın b’fothıd du rişathro dı Turkiya Receb Tayip Erdoğan.

 İ hadımto du mawtbo da senatore du parlamento dı Fransa Natali Ğule, tlıbla mu mawtbo di mşaynutho d’Emwotho Mhaydotho dmoyıd fusqono mqabıl di siyase dkımmaşyola Turkiya.

U waziro di baroyutho d’İtalya dmeqım Franko Frattini, bi hzayto dhule cali mudaxala dıksaymola Turkiya ba nathrawotho du madınho mescoyo u bathrawotho hrene, mawdacle d’İtalya sniqoytoyo ucdo l’rişonutho folitiqoyto, u mırle “cal dkıtwi meqım kımo ışne tahlufo du rişono du komisyon d’Urifi, jbiroyono dı domarno dlıkhozeno ucdo rişone qawye b’gawıd du Huyodo d’Urifi dkibın dımmi lu rişathro dı Turkiya Erdoğan: basyo u mede dıksaymatle bu qlimo du madınho mescoyo, ubebzabno bi sbutho du qrobo qaşyo d’Libya u ğer sebwotho hrene”.

Frattini sımleste qroyto lu rişono di şultonutho dı Trablos d’Libya Fayez Alsarraj dmakle ahjomayde mqabıl du gayso athronoyo dkımrayşanle Xalifa Haftar, umakadle dıklozım dmituw lu diyalog, bnişo dmımte l’şalyuthzayno b’Libya.

Megabo hreno, i hadımto du mawtbo da senatore du parlamento dı Fransa Natali Ğule bi maqırhonutho dhula athmıl lu tboco froso, mawdacla di mudaxala Turkoyto b’Libya latyo qonunoyto, u sımla qroyto lu mawtbo di mşaynutho d’Emwotho Mhaydotho dmoyıd fusqono mqabıl di siyase dkımmaşyola Turkiya, ubebzabno grışla u zuhoro calu fulhono stratejikoyo dı Turkiya dlatyo mathınhono la nathrawotho du yamo Mescoyo. Senatore Ğule mawdacla di mudaxala Turkoyto b’Libya maqşela i aykanoyutho zıttır bu athrano, u mırla “Anqara kmıstacımlo u haylo di Maşılmonutho siyasi awkith kımşadro l’Libya marıhbone u Maşılmone qaşye, bnişo dqathla yuthrone folitiqoye”.

Mxasra hreto, u mbahnono stratijikoyo Mayk Roben dkıtwe bebzabno mşalo bi wazirutho du sutoro d’Amerika du Pentagon, mawdacle du qedomo dıkmahwiyolen Turkiya kımthabıt dkıtyo mabuco di marhbonutho zıd mu gabo da Falohe d’Kurdistan di PKK dkımdacyo dkıtyo marıhbono.