Sim tahdid u waqıf d’Hrant Dink

Bıthır mu nesyuno du tewqido di cito u mu şloho du slibo, ucdoste mşadır egartho du tehdidi lu waqıf d’Hrant Dink dan Armnoye.

 Bi mawdconutho dfrısle u waqıf mawdacle, dsim u waqıf tahdid u tlıbbe dnufqina mu athro u bebzabno, mhadadlın Yakel Dink dkıtyo i athto du mnohnafşo Hrant Dink wa sniğreyda.

 Bi maqırhonutho dhuwle u waqıf mawdacle; Bu siqumo d’27 u 28 bu yarhano mşadır mail lu waqif dkıtyo malyo tahdide qaşye. Ahna’ste maşkelan li nuqazto da haylawotho di mşaynutho ulu hiğmuno d’Şişli cali sbuthathe.

Bi mawdconutho mırlın; U qatlo d’Hrant Dink’ste hawi qum caynotho dkull noşo ba 2007 bıthır mıd matiwole egrotho da tahdide. Inaqlayo’ste bu tahdidi da qatole hawxa mırwolın-Kiban dothina lox bzabno dlıknutrıt.

Bu tehdid dathi ucdo, kıtulbi ma mşale dnufqi me Turkiya u bebzabno mhadadlın, i barthzawgo du mnohnafşo Hrant Dink-Rakel wa sniğrathe. Bi mawdconutho dhuwlın a mşale kımmi; Bıthır ma mele du gzomo, di frişutho udi fliğutho dıksaymi a mşale du athro, kımamtın kısaymi hawxa tahdide. U waqfano mşataswo ba 2007 bıthır mu qatlo du gelyunoro Armınoyo Hrant Dink dı qtılwo bfalge di şuqo.

Bi mawdconutho dfriso bu tbocofroso kmitamır, du farsufo dımşadarle u mail du tahdid msik wu waziro di gawoyutho d’Turkiya’ste mdacele dımsik. Me gabo hreno u farsufo d’şlıhwole u Slibo di cito Armınoyto u dımhalaqowle cali arco marfe adyawma. Hathe mışkıl kmifaşqo latyo idico, elo bı athro xıd Turkiya, kowe kull mede mqabıl da came dkıtne şırşoye du athro.