Sim tahrazto b’Suroyo TV cali aykanoyutho di Daşto d’Ninve

U gabo du huyodo d’Bethnahrin Athroyo d’HBA du Iraq cam grub d’folitiqoye u hfite ma Maşılmone Caraboye Sunna d’Mawsal, mabdewolın meqım tloth ışne fulhone mşawtfe bnişo dmişahılfo Ninwe lı qlimo şaryo.

 Athmıl bi tahrazto haytho dıfrısle Suroyo TV, sımle baytoyutho lu rişono d’HBA u lı tıre hfite Caraboye dımşataswolın camıhdode u qyomo kenşoyo du qlimo d’Ninwe dkıtyo mbayno lfuth u nomuso esonoyo du Iraq.

 Athmıl blalyo, i tahrazto d’Qadaya Siyasiye dkımqadamla Carlos Hanna, sımla baytoyutho bu darbo du Skayp, lı tlotho dayfe mu athro du Iraq dkıtne: u rişono di sictho mtaybonitho du qlimo d’Ninwe Fares Jwejati dkıtyo bebzabno hadomo bi sictho mşatsonitho du qlimo, u hadomo di sictho mtaybonitho u mşatsonitho du qlimo d’Ninwe Şex Gazi Al Dwiş Aljarba wu rişono du gabo d’HBA Yusıf Yacqub Matti dkıtyo bebzabno hadomo bi sictho mşatsonitho du qlimo d’Ninwe.

Bi tahraztathe mahke aydarbo grub dıhfite ma came mşahılfe d’Ninwe mşataslın mi şato da 2017 uqyomo kenşoyo di mdabronutho du qlimo d’Ninwe dkıtyo banyo calu asas du nomuso esonoyo du Iraq. Ba tloth ışnani u rişono d’HBA u farsufe hfite ma Caraboye Sunna sımlın şişaltho d’fulhone mşawtıfe u yatiwi cam mathlone di şultonutho u du komisyon da guboye, u mqadamlın elaye talab ruşmoyo dmişahlıfo Ninwe lı qlimo şaryo bu taro du Iraq federaloyo demokratoyo. Afulhonani sımiwo rahuqo mu tboco froso.

Bi tahraztatheste dhınne xıd grub hzelın di aykanoyutho du Iraq kul dkothe azıltoyo lafı hrowo bi netije du fasad u di zıhniye tuxmonoye dlatyo athronoyto, mawxa ahfitani bu insiyativ dmabdelın mıstacmelın u mnoyo da 13 du mluo da 113 di daşto da 2008 dkobe fsoso dmişahılfo Ninwe lı tloth hiğmonwotho dkıtne i hiğmonutho di daşto d’Ninwe, d’Şigur u Tellacfar, ubebzabno aqıryawotho d’Ninwe dmişahılfi l’qastrat.

Atlotho zmine di tahraztathe, makadlın du qyomo kenşoyo du qlimo d’Ninwe kforış i tawditho mi şultonutho elo kmahwe iqoro la tawdiyotho u la came mşahılfe d’Ninwe, u bebzabno u qyomo kenşoyo ksonıd a zedqe di athto u kmahwe yasifutho lu dactid di claymutho, u knofıq mqabıl du renyo umthonoyo u di caşırto. Uqyomano kobeste fsoso dmişatıs gabe folitiqoye elo bşart dluwelın renye tuxmonoye awste diktator.

Bi tahrazto dıfriso b’Suroyo TV, mahkeste du grubano da hfite folitiqoye bıthır mıdmaltamwolın 51 alfo qole mu camo d’Ninwe, mqadamwolın talab ruşmoyo lu komisyon celoyo da guboye dmişahılfo Ninwe lı qlimo, elo u komisyon bu zabnawo şrewo mi wolithayde. U bıthır mathe u grub qadır dmaltım 60 alfo qole dımqaydi ruşmoyith b’listat cama raqme da talafonathe.